भारतको बथनाहाबाट विराटनगर आइपुग्दै कार्गो रेल

१८ जेठ, काठमाडौं । आज भारतको बथनाहाबाट विराटनगरको यार्डसम्म कार्गो रेल आउँदैछ । रेलको उद्घाटन भारतबाट भर्चुअल माध्यमबाट प्रधानमन्त्री प्रचण्ड र समकक्षी नरेन्द्र मोदीले संयुक्त रुपमा गर्दैछन् । उक्त कार्गो रेल बथनाहाबाट विराटनगरतर्फ छुटिसकेको छ । विराटनगरको एकीकृत जाँचबिन्दु (आइसीपी)सम्म औद्योगिक कच्चा पदार्थ बोकेर उक्त रेल आइरहेको छ ।

भारतबाट विराटनगरको कस्टम यार्डसम्म चल्ने कार्गो रेलको बुधबार दुई देशका प्रधानमन्त्रीले दिल्लीबाट उद्घाटन गरेका छन् । विराटनगरको बुधनगरस्थित कस्टम यार्डलाई सजाइएको छ । विराटनगरमा यहाँका उद्योगी व्यवसायी लगायत स्थानीयले स्वागत गर्नेछन् । 

रेलको लिक परीक्षण सफल भएको ४ वर्ष पुग्दा पनि भारतको बथनाहाबाट नेपालको कटहरीसम्म कार्गो रेल सञ्चालन हुन सकेको थिएन । बथनाहा रेल–वे स्टेशनबाट नेपाल कष्टम यार्डसम्मको ७ किलोमिटर अर्थात १५ मिनेटको समय लाग्ने दूरी पहिलोपटक २०७६ कार्तिकमा रेल–वे लिक परीक्षण गरिएको थियो ।