संसद भवन निर्माणको म्याद थपिदैनः मन्त्री गुरुङ

१८ जेठ, काठमाडौ । शहरी विकासमन्त्री सीता गुरुङले संघीय संसद् भवन निर्माणको ठेक्का अवधि थप्न नसकिने बताएकी छन् । समयमा निर्माण सम्पन्न नगरेको ठेकेदार कम्पनीले दोस्रो पटक समय थप गर्नका लागि सरकारसँग आग्रह गरेको अवस्थामा मन्त्री समय थप्न नसकिने बताएकी हुन् । 

सिंहदरबारस्थित निर्माणधीन संसद् भवनको निरीक्षण एवं अवलोकनका क्रममा बिहीबार मन्त्री गुरुङले यसअघि नै सरकारले दुई पटकसम्म म्याद थपिसकेको भन्दै अब ठेक्का समय थप्न नसक्ने अवस्थामा पुगिएको बताएकी हुन् ।

२०७४ को निर्वाचनबाट आएको प्रतिनिधिसभाको अन्तिम अधिवेशन नै नयाँ संसद् भवनमा बस्ने योजना रहेको बताएका बेला नयाँ संसद् आइसकेपछि पनि भवन निर्माणको काम सकिएको छैन । भवन निर्माणको काम निक्कै सुस्त भइरहेको संसद् सचिवालयका अधिकारीले बताएका छन् । 

ठेकेदार कम्पनीले दुई सिफ्टमा रातदिन काम गर्ने र यसअघि थपिएकै समयमा निर्माण सम्पन्न गर्ने भनेको तर त्यसो नदेखिएको मन्त्री गुरुङको भनाइ थियो । उनले हिउँदे अधिवेशन यहीँबाट नै सुरुवात गर्नुपर्छ भन्ने पक्षमा सरकार रहेको र निरन्तर निगरानी गरिरहेको बताइन् । निर्माणको काम सुस्त छ, यसलाई अघि बढाउन निर्देशन दिएपछि प्रगति भएको छ, जनशक्ति थोरै छ, बढाउनुपर्छ, नीतिगत निर्णय गर्न र भुक्तानी दिन सरकार तयार छ, उनले भनिन् ।