चितवनका व्यवसायी शंकर कँडेलको आत्महत्या दुरुत्साहन मुद्दाका अभियुक्त जेल चलान

१८ जेठ, काठमाडौं । चितवनका पोल्ट्री व्यवसायी शंकर कँडेल आत्महत्या दुरुत्साहन मुद्दामा पक्राउ परेका दुई जना अभिुक्तलाई अदालतले जेल चलान गरेको छ । 

बिहीबार जिल्ला अदालत चितवनका न्यायाधीश मात्रिकाप्रसाद आचार्यको एकल इजलासले आरोपीहरु प्रदीप रुङ्गटा र जीवन रावललाई मुद्दा पुर्पक्षका लागि कारागार पठाउने आदेश दिएको हो ।

अभियुक्त रुङ्गटा फरार छन् भने रावल पक्राउ परी प्रहरी हिरासतमा छन् । उनलाई आजै जेल पठाइनेछ । दुई जनाले दिएका मानसिक यातनाकै कारण कँडेलले आत्महत्या गरेको भन्दै भाइ राजन कँडेलले आत्महत्या दुरूत्साहन कसुरमा किटानी जाहेरी दिएका थिए । सोही जाहेरी परेपछि दुवै जना फरार भएका थिए । रावललाई मात्र प्रहरीले पक्राउ गर्न सकेको छ । 

कँडेलले भरतपुर महानगरपालिका–३, बेलचोकस्थित आफ्नै कार्यालयमा गत वैशाख २० गते मंगलबार साँझ कँडेल झुण्डिएर आत्महत्या गरेको अवस्थामा शव फेला परेको थियो । घटनास्थलबाट अभियुक्तहरुको नाम लेखेर सुसाइड नोट छाडेको पाइएको थियो । 

अनमोल फिड्स प्रालिका संचालक रहेका कँडेलले रावल र रुंगटालाई शेयर बिक्री गरेका थिए । तर पैसा पाउन नसक्दा तनाव परेका थिए । सुशाइड नोटमा आफूलाई दुई जनाले मानसिक र धम्की दिएको उल्लेख रहेको पाइएको छ । कँडेल नेपाली कांग्रेसका सक्रिय कार्यकर्ता समेत थिए ।