नक्कली शरणार्थी प्रकरणमा १५ अभियुक्तको बयान सकियो, खाण र रिजालकाे भाेलि

१८ जेठ, काठमाडौं । नक्कली भुटानी शरणार्थी प्रकरणमा पक्राउ परेका बालकृष्ण खाण, टोपबहादुर रायमाझीसहित १८ मध्ये १५ जना अभियुक्तको काठमाडौं जिल्ला अदालतमा बयान सकिएको छ ।

न्यायाधीश प्रेमप्रसाद न्यौपानेको इजलासमा अदालतका कर्मचारीले उनीहरुलाई बयान लिएका थिए । बिहीबार एमाले सांसद समेत रहेका अभियुत्त, टोपबहादुर रायमाझी, पूर्वासभासद आङटावा शेर्पा र हज कमिटीका अध्यक्ष शमसेर मियाँको बयान लिइएको थियो । 

भोलि शुक्रबार पूर्वगृहमन्त्री समेत रहेका नेपाली कांग्रेसका केन्द्रीय सदस्य अभियुक्त बालकृष्ण खाण र भुटानी शरणार्थीका नेता टेकनाथ रिजालको बयान हुने जिल्ला अदालतका सूचना अधिकारी दीपक दाहालले बताए । पक्राउ परेका सबैको बयान सकिएपछि थुनछेक बहस हुने उनले बताए । 

नेपाली नागरिकलाई नक्कली भुटानी शरणार्थी बनाएर अमेरिका उडाउने प्रलोभनमा पारेर सयौं जनाबाट रकम असुल गरेको प्रकरणमा ३० जनाविरुद्ध मुद्दा दायर गरिएको छ । सबै जनाविरुद्ध ठगी, संगठित अपराध, राज्यविरुद्धको कसुर र लिखित कीर्ते कसुरमा मुद्दा चलाइएको छ ।

प्रकरणमा फरार रहेका ललितपुरका हरिभक्त महर्जनले भने आजै मात्र अदालतमा आफैं उपस्थित भएर आत्मसमर्पण गरेका छन् । उनलाई प्रहरीले पक्राउ गरी अनुसन्धान सुरु गरेको छ । उनकी पत्नी लक्ष्मी यसअघि नै पक्राउ परी अदालतमा बयान समेत सकिएको छ ।