नागरिकता विधेयक राजपत्रमा प्रकाशित, संशाेधित ऐनमा के छ नयाँ व्यवस्था ?

१९ जेठ, काठमाडौं । राष्ट्रपति रामचन्द्र पौडेलले बुधबार प्रमाणीकरण गरेको नागरिकता विधेयक शुक्रबार राजपत्रमा प्रकाशन गरिएको छ ।

विधेयक राजपत्रमा प्रकाशित भएसँगै नागरिकतासम्बन्धी नयाँ  व्यवस्थासहितकाे नागरिकता ऐन आएकाे छ ।  नागरिकता ऐन २०६३ लाई संशोधन गरेर नयाँ  ऐन बनाइएकाे हाे ।

संशाेधित ऐनमा बाबु वा आमा पत्ता नलागेका बालबालिकालाई १६ वर्ष उमेर पूरा गरेपछि वंशजका आधारमा नागरिकता दिने व्यवस्था छ ।

यस्तै २०७२ असोज ३ भन्दा अघि जन्मका आधारमा नेपाली नागरिकता लिएका बाबुआमाका सन्तानले १६ वर्ष उमेर पूरा भएपछि वंशजका आधारमा नागरिकता पाउने व्यवस्था नयाँ ऐनमा छ ।

त्यस्तै नेपालको नागरिक आमाबाट नेपालमा जन्म भई नेपालमै बसोबास गरेका तर बाबुको पहिचान हुन नसकेका व्यक्तिले पनि वंशजका आधारमा नागरिकता पाउनेछन् । साथै, विदेशी नागरिकसँग विवाह गरेकी नेपाली महिलाबाट नेपालमा जन्मिएको व्यक्तिले पनि नेपाली नागरिकता लिने बेला निजका आमा र बाबु दुवै नेपाली नागरिक रहेछन् भने वंशजका आधारमा नेपालको नागरिकता पाउनेछ।