हिरासतमा रहेका १८ जनाकै बयान सकियो, थुनछेक बहस सुरू हुने

१९ जेठ, काठमाडौं । नेपालीलाई नक्कली भुटानी शरणार्थी बनाएर अमेरिका उडाउने भनी करोडौं रूपैयाँ असुल गरी राज्यविरुद्ध अपराध गरेको कसुरमा मुद्दामा पक्राउ परी हिरासतमा रहेका १८ जना सबै अभियुक्तको अदालतमा बयान सकिएको छ । 

काठमाडौं जिल्ला अदालतका न्यायाधीश प्रेमप्रसाद न्यौपानेको इजलासमा जेठ १२ गतेदेखि लिन सुरु गरेको बयान शुक्रबार सकिएको हो । आज पूर्वगृहमन्त्री समेत रहेका नेपाली कांग्रेसका नेता बालकृष्ण खाण, भुटानी शरणार्थी नेता एवं अभियन्ता टेकबहादुर रिजाल र ललितपुरका हरिभक्त महर्जनको बयान लिइयो । 

नक्कली शरणार्थी प्रकरणमा प्रहरी प्रतिवेदनको आधारमा जिल्ला सरकारी वकिलको कार्यालयले खाण, एमाले सांसद टोपबहादुर रायमाझीसहित ३० जनालाई प्रतिवादी बनाएर मुद्दा दर्ता गरेको छ । १२ जना अझै फरार छन् । मुद्दामा २८ करोड ८१ लाख रुपैयाँ बिगो, ठगिएको रकम फिर्ता र कैद सजाय मागदाबी गरिएको छ । 

बयान सकिएसँगै आउँदो आइतबारदेखि अदालतमा थुनछेक बहस सुरु हुने भएको छ । थुनछेक बहस सकिएपछि आरोपितलाई साधारण तारेखमा वा धरौटीमा छोड्ने वा पूर्पक्षका क्रममा कारागार पठाउने टुंगो लाग्ने अदालतका सूचना अधिकारी दीपक दाहालले बताए । 

बयानमा अभयुक्तहरुले इन्कारी बयान दिएपनि अनुसन्धानबाट खुलेका तथ्य र प्रमाणले कसुर पुष्टि हुने वस्तुनिष्ठ आधार र प्रमाण रहेको अनुसन्धानमा संलग्न अधिकारी बताउँछन् ।

हाल हिरासतमा रायमाझी, खाण, रिजाल, महर्जन, सरकारका सचिव टेकनारायण पाण्डे, गृहमन्त्रीका तत्कालीन सुरक्षा सल्लाहकार इन्द्रजति राई, लक्ष्मी महर्जन, प्रकरणका नाइके केशव दुलाल, सानु भण्डारी, कांग्रेसका पूर्व सांसद आङटावा शेर्पा, नेपाल हज समितिका अध्यक्ष शमशेर मियाँ, सन्दीप, सागर राई, टंक गुरुङ, रामशरण केसी, नरेन्द्र केसी र गोविन्द चौधरी छन् । 

प्रहरीले फरारको खोजी गरिरहेको छ । खोजी क्रममा हरिभक्त र लक्ष्मी पछिल्लो पटक पक्राउ परको थिए । उनीहरु पति पत्नी हुन् । टाेपबहादुर र सन्दीप बाबु-छाेरा हुन् ।