कांग्रेस रुपान्तरण अभियानको पोखरामा भेला

२० जेठ, काठमाडौं । नेपाली कांग्रेसका तेस्रो पुस्ताका नेताहरुले सुरु गरेको पार्टी रुपान्तरण अभियान अन्नतर्गत शनिवार पोखरामा नेता तथा कार्यकर्ताको भेला आयोजना गरिएको छ । पार्टी नेतृत्व सत्ता प्राप्तिको खेलभन्दा बाहिर निस्किन नसकेको भन्दै कांग्रेसलाई आमजनसँग जोड्न उक्त अभियान थालिएको नेताहरुले बताएका छन् । 

अभियानको गण्डकी प्रदेश अन्तर्गतका आज पोखरामा राखिएको हो । केन्द्रबाटै केही कार्यक्रम गरिने नदेखिएपछि अभियान थालिएको नेताको भनाइ छ । कांग्रेसमा अहिले भइरहेको गतिविधिले उसको लोकतान्त्रिक चरित्रमै प्रश्न उठिरहेको महसुस आफूहरुले गरेको अभियानका नेताहरु बताउँछन् । कांग्रेस आफ्नो पूर्व लोकतान्त्रिक मान्यता अनुरुप नचलेको र पार्टि २००७ सालको क्रान्तिअघि जन्मिएको भएपनि समय सापेक्ष माग पूरा गर्न नसक्ने अवस्था देखिन थालेको भन्दै अभियान चलाउनु परेको उनीहरुको भनाइ छ । 

गएको आम निर्वाचन र त्यसपछि सम्पन्न उपनिर्वाचनको परिणामले कांग्रेस कार्यकर्ताहरुमा निराशा बढेको छ । कांग्रेसको जनमत घट्दो रहेको देखिएको छ । यस्तो अवस्थामा पनि सभापति शेरबहादुर देउवा सरकारबाहिर आउन नसक्दा पार्टी नै अन्योलम परेको तेस्रो पुस्ताका नेताहरुलाई लागेको छ । 
 
अभियानका क्रममा कांग्रेसलाई आगामी दिनमा कसरी लैजाने भन्ने विषयमा सुझाव संकलन गरिने बताइएको छ । अभियान सातै प्रदेशका विभिन्न जिल्लामा सञ्चालन हुनेछ । प्रतिनिधिमूलक रुपमा प्रदेशमा विशेष कार्यक्रम गर्ने र अभियानका क्रममा स्थानीय सरकारमा कांग्रेसका प्रतिनिधिले गरिरहेका कामका विषयमा पनि सुझाव संकलन गरिने बताइएको छ ।