नक्कली भुटानी शरणार्थी मुद्दामा सरकारी वकिलको थुनछेक बहस सकियो

२३ जेठ, काठमाडौं । नक्कली भुटानी शरणार्थी प्रकरणमा ३० जनालाई प्रतिवादी बनाएर काठमाडौं जिल्ला अदालतमा जेठ ८ मा दर्ता भएको ठगी, संगठित अपराध, राज्यविरुद्धका कसुर र लिखत कीर्तेसहित एकीकृत कसुरमा मुद्दा दर्ता गरिएको छ । 

सो मुद्दामा पक्राउ परी प्रहरीको न्यायिक हिरासतमा रहेका १८ प्रतिवादीहरुको बयान सकिएपछि आइतबारदेखि सरकारी वकिलको बयान भएको थियो । न्यायाधीश प्रेमप्रसााद न्यौपानेको इजालसमा भएको बहसमा तीन दिनमा ६ सरकारी वकिलले बहस गरेका छन् । 

सरकारी वकिलका तर्फको बहस आज सकिएको अदालतका सूचना अधिकारी दीपक दाहालले बताए । अब मुद्दाका प्रतिवादीतर्फका वकिलहरुले बहस गर्ने उनले बताए । सरकारी वकिलहरुले बहसमा यस मुद्दामा प्रतिवादीलाई थुनामुक्त गरे प्रमाण नष्ट हुनसक्ने तथा जाहेरीकर्ताको सुरक्षामा खतरा हुनसक्ने भन्दै थुनामा राखेर नै मुद्दाको पुर्पक्ष गर्नुपर्ने जिकिर गरेका छन् ।

नक्कली भुटानी शरणार्थी प्रकरणमा संलग्न रहेको आरोपमा पक्राउ परेका पूर्वउपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाँणसहित १८ जनालाई थुनछेक बहसका लागि उपस्थित गराइएको छ । १२ जना फरार छन् । उनीहरुविरुद्ध ४ मुद्दामा कैद सजायको मागदाबी र २८ करोड ५० लाख बिगो मागदाबी गरिएको छ ।