बृहत आर्थिक गोलमेच सम्मेलन गरौं : योगेश भट्टराई

२३ जेठ, काठमाडौं । नेकपा (एमाले)का सचिव एवं सांसद योगेश भट्टराईले अर्थतन्त्रलाई संकटमा पर्न नदिन बृहत आर्थिक गोलमेच सम्मेलन गर्न प्रस्ताव गरेका छन् । सरकारले जेठ १५ मा संसदमा प्रस्तुत गरेको आगामी आर्थिक वर्ष २०८०/८१ को बजेटमाथि मंगलबार प्रतिनिधिसभा बैठकमा छलफलमा भाग लिँदै सांसद भट्टराईले यस्तो प्रस्ताव गरेका हुन् ।

उनले सरकारले ल्याएको बजेटले अर्थतन्त्रको विद्यामान सामान्य अवस्थालाई समेत सम्बोधन गर्न नसकेको भन्दै आर्थिक वृद्धिमा सुधार नल्याउने टिप्पणी गरे । आर्थिक दर सुधारमार्फत अर्थतन्त्रलाई चलायमान बनाउन उनले विदेशी दाताहरुसमेत सहभागितामा बृहत आर्थिक गोलमेच सम्मेलन गर्न सुझाव दिए । 

उनले मुलुक आर्थिक कुटनीतिक हिसाबले कमजोर रहेको बताए । कमजोरकै कारण भारतले चिनीयाँ लगानीमा बनेका आयोजनाको बिजुली नकिन्ने र तेस्रो देशबाट सस्तोमा पेट्रोल ल्याएर नेपाललाई महंगोमा बिक्री गरिरहेको बताए । 

आर्थिक कुटनीतिमा फेल भएकै कारण भारतबाट नेपालमाथि सबैतवरले हस्तक्षेप बढ्दै गएको उनको भनाइ छ । उर्जा उत्पादनमा भारतको दबदबाले नेपालको जलस्रोत उपयोग खुम्चिने खतरा बढेको उनले बताए ।
उनले बजेटका क्रममा कर दर तर्जुमा गर्दा संसदको अर्थ र लेखा समितिका सभापतिलाई राख्ने व्यवस्था गर्नुपर्ने बताए । यसबाट कर दर निर्धारणमा कसैको अनधिकृत प्रवेश र बिचौलियाले स्थान नपाउने उनको भनाइ छ ।