संसदमा बजेटको ठूलो हिस्सा डडेल्धुरा, नुवाकोट र गोरखामा खन्याउनु कारण मागियो

२३ जेठ, काठमाडौं । मंगलबार बसेको प्रतिनिधिसभाको बैठकमा सांसदहरुले सरकारले ल्याएको आगामी आर्थिक वर्ष २०८०/८१ का लागि ल्याएको बजेटको अधिकांश रकम सरकारका प्रभावशाली नेताहरुको क्षेत्र र जिल्लामा छुटयाएको भन्दै आपत्ति जनाएका छन् । 

राप्रपाका सांसद बुद्धिमान तामाङले अर्थमन्त्री डा. प्रकाशशरण महतले नुवाकोट डडेल्धुरा र गोरखामा बजेटको ठूलो रकम छुट्याएको सूचना आफूसँग भएको बताउँदै सूचनामा जस्तै त्यस जिल्लामा भारी बजेट रकम छुट्याइए चुप नबस्ने टिप्पणी गरे । भारी बजेट छुट्याउनुको कारण माग गरे । 

‘अर्थमन्त्रीज्यूले आगामी वर्षको बजेटको ठूलो हिस्सा डडेल्धुरा, गोरखा र नुवाकोटमा खन्याएको भन्ने हल्ला सुनिएको छ, त्यस्तो नहोस्,’ उनले भने, ‘यदि हल्ला सावित भयो भने धादिङका जनता चुप बस्दैनन् ।’ धादिङ र गोरखाका सीमाना बन्ने बुढी गण्डकी जलबिद्युत आयोजनामा आवश्यक बजेट छुट्याउन माग गरे । उनले कृषिमा सरकारले उल्लेख्य मात्रामा बजेट छुट्याएर नयाँ कार्यक्रम ल्याएको भन्दै प्रसंशा गरे ।

डडेल्धुरा कांग्रेस सभापति शेरबहादुर देउवा, गोरखा प्रधानमन्त्री प्रचण्ड र नुवाकोट अर्थमन्त्री महत स्वयंकै निर्वाचन क्षेत्र रहेको जिल्ला हो । कांग्रेसको मुख्य समर्थनमा प्रचण्डमा प्रधानमन्त्री बनेका हुन् ।