सीमित समूहले आयकरको डर देखाएर साना लगानीकर्ता तर्साउने काम भयोः अर्थमन्त्री

२५ जेठ, काठमाडौं । अर्थमन्त्री डा. प्रकाशशरण महतले सीमित समूहले आयकरको डर देखाएर शेयरबजारबाट ठूलो फाइदा लिन खोजेको बताएका छन् । उनले शेयरबजारमा सीमित व्यक्तिले मात्र फाइदा लिने प्रवृत्तिको अन्त्य नभएसम्म साना लगानीकर्ताले फाइदा लिन नसक्ने बताएका छन् । 

बिहीबार नेपाल धितोपत्र बोर्डको ३१ औँ वार्षिकोत्सवका अवसरमा आयोजित कार्यक्रम उनले शेयरबजारमा सीमित व्यक्तिले मात्र फाइदा लिने प्रवृत्तिको अन्त्य हुनुपर्ने बताए । उनले ५६ लाख डिम्याट होल्डरलाई देखाएर सीमित समूहले फाइदा लिने गरेको भन्दै उनले यसको अन्त्य हुनुपर्नेमा जोड दिए । 

थोरै लगानी गर्नेले पनि शेयरबजारबाट कमाउने वातावरण बनाउनुपर्ने महतले बताए । शेयरबजारमा खेल्ने समूहले करको कुरा उठाएर फाइदा लिएको उनको भनाइ छ । त्यस समूहले बजारमा शेयरका विषयमा भ्रम सिर्जना गरेको र यो हुन नदिन आफू दृढ रहेको पनि उनले बताए । बजेटमा आफ्नो स्वार्थ नपरेकाले अहिले कतिपय असन्तुष्ट रहेको उनको टिप्पणी छ । बजेटले व्यवसायीलाई मर्कामा नपारेको जिकिर उनले गरे । 
 
शेयरबजारमा चलखेल गर्ने हेतुले केही लगानीकर्ताहरुले सबै लगानीकर्ताहरुलाई आम्दानीमा आयकर लाग्छ भन्दै बजार बढाउने र घटाउने गरेर फाइदा लिएको उनले बताए । महतले शेयरबजारमा अहिले वित्तीय र जलविद्युत क्षेत्रका कम्पनीहरू धेरै सूचीकृत भएको बताउँदै अन्य रियल सेक्टरका कम्पनीहरूलाई शेयरबजारमा समावेश गर्नुपर्ने बताए ।