चुरे छुनुभयो भने आगो बल्छ : रघुजी पन्त

२५ जेठ, काठमाडौं । प्रमुख प्रतिपक्षी दल नेकपा (एमाले)का सांसद रघु जी पन्तले चुरेको ढुगा, गिट्टी र माटो उत्खनन गरेर बिक्री गर्ने सोच नराख्न सरकारको ध्यानाकर्षण गराएका छन् । 

बिहीबार प्रतिनिधिसभाको बैठकमा आगामी आर्थिक वर्षको बजेटमाथि छलफलमा धारणा राख्दै सांसद पन्तले सरकारले बजेटमा चुरेको ढुंगा, गिट्टी विदेशमा बिक्री गर्ने नीति राखेर राष्ट्रघाती कदम चालेको आरोप लगाए छ । उनले बजेट देश र जनताको पक्षमा नरहेको टिप्पणी गरे । साथै ‘दाल के को गहतको, बजेट कसको महतको’ भन्दै व्यंग्य समेत गरे । 

उनले सरकारले कुनैपनि बाहानामा चुरेको ढुंगा, गिट्टी र माटो उत्खनन गरेर निर्यात गर्ने कोशिस गरे आगो बाल्ने चेतावनी दिए । उनले प्रधानमन्त्री प्रचण्डको गोरखा, अर्थमन्त्रीको नुवाकोट र कांग्रेस सभापति शेरबहादुर देउवाको डडेल्धुरामा बजेटका ५० प्रतिशत हिस्सा खन्याएको समाचार आएको भन्दै यसमा अर्थमन्त्रीले जवाफ दिनुपर्ने बताए । ‘सरकारले चुरेको ढुंगा, माटो र गिट्टी बेच्छु् भनेको सोचेको छु भने ख्याल गर्नू’ उनले भने, ‘त्यसो गरियो देशमा आगो बल्छ ।

तत्कालीन सरकारले २०७४ देखि राष्ट्रपति चुरे संरक्षण कार्यक्रमसहित यस क्षेत्रमा उत्खनन गर्न रोक लगाउँदै आइरहेको छ । चुरे तराईका जिल्लामा पानी मुख्य स्रोत मानिएको छ । यहाँका ढुंगा गिट्टी झिकिए तराई भरुमूमिमा परिणत हुने चिन्ता नागरिक तहसम्म परेको छ । 

तर सरकारले आगामी आर्थिक वर्ष २०८०/८१ को बजेटमा चुरेमा रहेका ढुंगा र गिट्टी उत्खनन गरी निर्यात गरेर व्यापार घाटा घटाउने सक्ने लक्ष्य समेटिएको छ । जसको चौतर्फी विरोध भइरहेको छ । यसअघि एमाले नेतृत्वको सरकारले पनि २०७८ को आवमा चुरे उत्खनन गर्ने घोषणा गरेको थियो । तर विरोधकै कारण रोकिएको थियो ।