शेयरबजारमा सुधार जारी, २ अर्ब बढीको खरिदबिक्री

२५ जेठ, काठमाडौं । शेयरबजारमा लगातार तेस्रो दिन सुधार भएको छ । बिहीबार नेप्से सूचक ७.२७ अंकले बढेर १९३९.६१ विन्दुमा पुगेको छ ।

२ अर्ब ३० करोड रुपैयाँ भन्दा बढीको शेयर खरिदबिक्री भएको छ । पछिल्लो केही समययता नेप्से सूचकसँगै कारोबार रकममा पनि सुधार हुँदै गएको छ । विशेषगरी, शेयरबजारलाई प्रभावित बनाइरहेका समस्यहरु क्रमशः हल हुँदै जाँदा बजार पनि सकारात्मक बन्न थालेको हो ।

पछिल्लो समय बैंकिङ प्रणालीमा तरलताको अवस्थामा सुधार हुँदै गएको छ । कर्जा निक्षेपको अनुपात तल आएको छ भने अन्तर बैंक ब्याजदर पनि घटेको छ । गत वर्ष बाह्य कारणहरुले अर्थतन्त्रमा असर गरेको थियो र उच्च ब्याजदरका कारण सेयर बजार पनि प्रभावित बनेको थियो । यद्दपि, पछिल्लो समय ब्याजदर केही घट्ने क्रममा रहेको छ । 

साथै, शेयरबजारको बियरिस चक्र पनि करिब पूरा भइसकेकाले बजारले सकारात्मक गति समाउने लगानीकर्ताको आशा छ । बिहीबार २७३ कम्पनीको ५९ लाख ६२ हजार कित्ता भन्दा बढी सेयर कारोबार भएको छ । दोल्ती पावर कम्पनीको सेयर भाउमा सकारत्मक सर्किट लागेको छ । कारोबार रकमका आधारमा आइजीआई प्रुडेन्सियल इन्सुरेन्स अघि आएको छ ।