प्रधानमन्त्री प्रचण्डविरूद्ध आएका रिट दर्ता गर्नूः सर्वोच्च

२६ जेठ, काठमाडौं । सर्वाेच्च अदालतले प्रधानमन्त्री पुष्पकमल दाहाल प्रचण्डविरुद्ध युद्ध अपराध सम्बन्धीको रिट निवेदन दरपीठ गर्ने आफ्नै प्रशासनको निर्णय खारेज गर्दै आएका रिट दर्ता गर्न आदेश दिएको छ । यसअघि उनी विरुद्ध आएको रिट सर्वोच्च प्रशासनले दरपीठ गरेको थियो । 

सर्वोच्च अदालतका न्यायाधीश आनन्दमोहन भट्टराईको एकल इजलाशले शुक्रबार उक्त रिट निवेदन दरपीठ गर्ने सर्वोच्च अदालत प्रशासनको निर्णय खारेज गर्दै दर्ता गर्न आदेश दिएको हो । निवेदक लेनिन विष्टले रिट दर्ता गर्ने आदेश भएको बताए । योसँगै प्रधानमन्त्री प्रचण्डविरूद्ध युद्ध अपराधसम्बन्धी रिट दर्ताको बाटो खुलेको छ ।

बाल सेना प्रयोग गरेर युद्ध अपराध गरेको भन्दै दायर गर्न खोजेको रिट निवेदन दरपीठ गर्ने निर्णय खारेज भएपछि अब आइतबार प्रचण्ड विरुद्ध रिट निवेदन हाल्ने तयारी गरिएको छ । 

बाल सेना प्रयोग गरेर प्रधानमन्त्री पुष्पकमल दाहाल प्रचण्ड र नेपाल समाजवादी पार्टीका अध्यक्ष बाबुराम भट्टराईले युद्ध अपराध गरेकाले तुरुन्तै प्रचण्डलाई प्रधानमन्त्री पदबाट मुक्त गर्नुपर्ने माग राख्दै सो मुद्दा सर्वोच्चमा रिट निवेदन दिइएको थियो ।