जनता माविमा खुल्ला तीज गीत तथा एकल नृत्य प्रतियोगिता

२ असोज, स्याङजा । लत्रे पिपल ईन्टरटेनमेन्ट मिडिया हाउस प्रालिले हरितालिका तीज ०८० को अवसरमा खुल्ला तीज गीत तथा एकल नृत्य प्रतियोगिता सम्पन्न गरेको छ ।

पुतलीबजार ७ स्थित जनता माविको प्रांगणमा सम्पन्न तीज गीततर्फ लत्रे पिपल समाज सुधार आमा समूह पुतलीबजार ३ प्रथम, कालिका आमा समूह पुतलीबजार ७ द्वितीय, नमुना आमा समूह पुतलीबजार ७ तृतीय र जनता मावि विद्यार्थी समूह सान्त्वना पुरस्कारबाट विभूषित भएका छन् ।

त्यस्तै एकल नृत्य प्रतियोगितातर्फ आरती रेग्मी प्रथम, रश्मी क्षेत्री द्वितीय, शिवानी क्षेत्री तृतीय र मोनिका थापाले सान्त्वना पुरस्कार पाएका छन् । बिजेताहरुलाई नेपाली कांग्रेस क्षेत्र नं १ का सचिव तथा कार्यक्रमका प्रमुख अतिथि मनोज मल्लले नगदसहित प्रमाणपत्र वितरण गरेका थिए ।

लत्रे पिपल ईन्टरटेनमेन्ट मिडिया हाउसका प्रालिका अध्यक्ष प्रेम थापाको सभापतित्व रहेको सो कार्यक्रममा नेपाली कांग्रेस क्षेत्र नं १ का सचिव मनोज मल्लको प्रमुख आतिथ्यता रहेको थियो ।

सो कार्यक्रममा पुतलीबजार नगरपालिका वडा नं ७ का अध्यक्ष कृष्ण बहादुर आले, वडा नं ३ का सदस्य सोम बहादुर कुवंर, वडा नं ७ का निवर्तमान अध्यक्ष विश्वेस्वर प्रसाद रेग्मी, नेपाली कांग्रेस वडा नं ७ का सभापति नरेन्द्र विक्रम थापाले शुभकामना मन्तव्य राखेका थिए भने  संचालन समुन्द्र नेपालले गरेका थिए ।