सशस्त्र प्रहरीमा दुई डीआईजीलाई स्पष्टीकरण !

३ असार, काठमाडौं । राजनीतिक दलका नेताहरूसँग संगत बढाएको भन्दै सशस्त्र प्रहरी बलका एक डीआईजी अञ्जनीकुमार पोखरेल र दुई एसएसपीलाई स्पष्टीकरण सोधिएको छ ।

यस्तै आगलागी प्रकरणमा अर्का डीआईजी पुरुषोत्तम थापालाई पनि स्पष्टीकरण सोधिएको छ । यो स्पष्टीकरणलाई सशस्त्र प्रहरीले गोप्य राख्न चाहेको छ । डीआईजी पोखरेललाई संगठनको आन्तरिक नीति नियम र आचारसंहिता उल्लंघन गरेको आरोप लगाइएको स्रोतको दावी छ । 

बराह बाहिनीबाट मधेश प्रदेशमा रहेको छिन्नमस्ता बाहिनीमा सरुवा चाहेका डीआईजी पोखरेलले माओवादीका नेताहरूसँग भेटघाट गरेको स्रोतको दावी छ । त्यस्तै थापालाई सशस्त्र प्रहरी बल, नेपाल नं. ९ पशुपतिनाथ बाहिनीबाट सुरक्षा जिम्मेवारीमा रहेका बेला सशस्त्र प्रहरीको केन्द्रीय भण्डारणमा आगलागी भएको थियो ।

सो विषयमा उनलाई कारबाहीको लागी पहिलो चरणमा स्पष्टीकरण सोधिएको सशस्त्र प्रहरी मुख्यालय स्रोतले जनाएको छ । पोखरेल हाल सानो गौचरणमा रहेको स्टाफ कलेजमा कार्यरत रहेका छन् । थापा मुख्यालयमै कार्यरत रहेका छन् । दुवै डीआईजी सिं सं १ का व्याची हुन् । उनीहरू दुवै जना संगठनको भावी नेतृत्वको प्रतिस्पर्धी पनि थिए ।