आदेश कार्यान्वयन भए साउन १ देखि सरकारी कर्मचारीलाई मर्यादाक्रम अनुसार तलब

२७ असार, काठमाडौं । समान मर्यादामा रहेका कर्मचारीहरूको तलब असमान रहेको भन्दै परेको रिटमा सर्वोच्च अदालतले मर्यादाक्रम अनुसार तलब समायोजन गर्न सरकारलाई आदेश गरेपछि कर्मचारीहरू साउन १ गते देखि तलब बढेर आउने आसमा छन् । आदेश कार्यान्वयन गर्ने भए सरकारले साउन १ बाट तलब  समायोजन गर्नुपर्छ ।  
 
समान मर्यादा क्रममा रहेका तर अन्य सरकारी सेवाको भन्दा कम तलब पाएका कर्मचारीको तलब समायोजन गर्न सर्वोच्चले असार १० गते सरकारका नाममा आदेश जारी गरेको थियो । यसपछि मर्यादाक्रम अनुसार तलब नपाएका कर्मचारीहरू अब तलब बढेर आउने आसमा बसेका छन् । आदेश कार्यान्वयन भए तहअनुसार फरक तलब पाइरहेका कर्मचारीको तलब समान हुनेछ । 

निजामती सेवा उपसचिव वा सो सरहका कर्मचारी र प्रमुख सेनानी र प्रहरी उपरीक्षकको तलब फरक छ । उपसचिवको सुरु तलबमान ४८ हजार ७३७ छ भने सुरक्षा निकायमा ५२ हजार २७९ छ । निजामती सेवाका शाखा अधिकृत वा सोसरहका अन्य कर्मचारीको सुरु तलबमान ४३ हजार ६८९ छ । मर्यादा क्रममा पछि रहेका उपसेनानीको तलब ४५ हजार १०३ छ । सुरक्षा निकायतर्फ पनि प्रहरी निरीक्षकको तलबमान भने निजामतीसरह छ ।

निजामती सेवाका राजपत्रांकित प्रथम, द्वितीय र तृतीय श्रेणीका कर्मचारीको सुरुको तलब मर्यादा क्रममा रहेका अन्य सरकारी सेवामा रहेका कर्मचारी सरह बनाउनुपर्नेछ । सर्वोच्चले कर्मचारीको मनोबल उच्च राख्न आगामी आव २०८१÷०८२ को सुरुबाट नै सुरु तलबमान आवश्यक समायोजन गरी विभेद र असमानता सम्बोधन गर्न भनेको छ । 

समान मर्यादा क्रममा रहेका निजामती सेवाका सहसचिव तथा सो सरहका अन्य पदमा रहेका कर्मचारीभन्दा मर्यादा क्रममा पछि रहेका सुरक्षा निकायका अधिकारीको पारिश्रमिक बढी छ । सहसचिवलाई मर्यादाक्रमको १६ औँ स्थानमा राखिएको छ । जसको तलब ५६ हजार ७८७ छ तर १७ औँ नम्बरमा रहेका सहायक रथी, प्रहरी नायब उपरीक्षक लगायतको पारिश्रमिक ६० हजार ९५० छ । सरकारले साउन १ देखि समान बनाउनुपर्नेछ ।