सुरुवा हुन चाहेका उपसचिवसम्मका कर्मचारीले १५ भित्र रितपूर्वक निवेदन दिनुपर्ने

१६ साउन, काठमाडौं । सरकारले सरुवाका लागि निवेदन दिन कर्मचारीहरूलाई भनेको छ । संघीय मामिला तथा सामान्य प्रशासन मन्त्रालयले सरुवा हुन चाहने कर्मचारीलाई निवेदन दिन आह्वान गरेको हो ।  मन्त्रालयले बुधबार सूचना प्रकाशित गरेर मन्त्रालय, निकाय वा अर्को कार्यालयमा सरुवा हुन चाहने उपसचिव तहसम्मका कर्मचारीले इच्छाएको ठाउँ उल्लेख गरेर निवेदन दिनुपर्नेछ । 

मन्त्रालयले निजामती ऐन २०४९ तथा नियमावली २०५० अनुसार मन्त्रालय वा मन्त्रालय स्तरको केन्द्रीय निकाय वा विभागले प्रत्येक वर्षको असोज १५ गतेसम्म सरुवा गर्ने उल्लेख छ । क्षेत्रीय स्तरका निकायहरूले असोज १६ देखि मसान्तसम्म सरुवा गर्ने नियमावलीमा व्यवस्था गरिएको छ । सोही अनुसार मन्त्रालयले बुधबार सूचना प्रकाशित गरेर निवेदन माग गरेको मन्त्रालयको संघीय तथा प्रादेशिक कर्मचारी प्रशासन शाखाका उपसचिव कमल भट्टराईले जानकारी दिए ।

संघीय मामिला मन्त्रालयले उपसचिवसम्मको सरुवा भदौ १ देखि भदौ मसान्तभित्र गर्नेछ । मन्त्रालयले उपसचिवसम्मको सरुवा गर्नेछ भने सहसचिवको सरुवा मन्त्रिपरिषदले गर्ने ऐनमा उल्लेख छ । सहसचिवको सरुवा अवधि नहुने र सरकारले जतिबेला पनि सरुवा गर्न सक्ने भएकाले यसलाई दुरुपयोग गरेर १५–१५ दिनमा जथाभावी सरुवा गर्दै आएको छ ।

उपसचिव भट्टराईले सरुवा हुन चाहनेले सूचना प्रकाशित भएको १५ दिन भित्रमा निवेदन दिनुपर्नेछ । निवेदन इमेलबाट पनि पठाउन सकिने उनले जानकारी दिए । सरुवा हुन चाहनेले आफ्नो वैयक्तिक विवरण(पीआईएस) अद्यावधिक गरी इमेलमार्फत निवेदन पठाउन सक्ने व्यवस्था गरिएको छ । उपसचिवसम्म कम्तीमा दुई वर्ष सरुवा भएको स्थानमा राख्ने नियमावलीमा व्यवस्था भएपनि लागू हुन सकेको छैन ।