मन्त्री पदले लुम्बिनी कांग्रेसका विवाद, प्रमुख सचेतक तिमिल्सिनाले दिए पदबाट राजीनामा

२५ साउन, बुटवल । मन्त्री भागबण्डले लुम्बिनी कांग्रेसमा विवाद देखिएको छ । लुम्बिनी प्रदेश सभाका कांग्रेस प्रमुख सचेतक जन्मजय तिमिल्सिनाले पदबाट राजीनामा दिएका छन् । उनले राजीनामा दिएपछि मन्त्री पदले कांग्रेसमा असन्तुष्टि सिर्जना गरेको नेताहरूले बताएका छन् । तर, तिमिल्सिनाले कार्यव्यस्तताका कारण राजीनामा दिएको भनेका छन् । 

उनले प्रमुख सचेतक नियुक्त हुँदा धेरै समय दिन नसकेको भन्दै कार्यव्यस्तताको कारण देखाएका छन् । उनी निकट नेताहरूको भने मन्त्री पद नपाउँदाको असन्तुष्टिका कारण उनले राजीनामा दिएको बताएका छन् । नेपाली कांग्रेसका तर्फबाट गुल्मीका धनेन्द्र कार्की, दाङका प्रचण्ड विक्रम न्यौपाने, प्युठानका रोज राणा भनिने सरोज थापा र बाँकेका बादशाह कुर्मी मन्त्री बनेका छन् । 

कांग्रेसको भागमा परेको आन्तरिक मामिला मन्त्रालयमा पार्टीले अझै कसैलाई पठाउन सकेको छैन । सुरुमा सरकारमा कांग्रेसबाट सरकारको नेतृत्व तिमिल्सिनाले गर्ने भनिएको थियो । अन्तिममा मन्त्री बन्ने सूचीबाट उनको नाम हटाइएपछि उनी रुष्ट बनेका थिए । 

केही दिन मोबाइल स्वीचअफ गरेर बसेका तिमिल्सेनाले गत साउन २१ गते नै कांग्रेस संसदीय दलका नेता डिल्लीबहादुर चौधरीसमक्ष राजीनामा दिएका थिए ।  उनले प्रमुख सचेतकले पाउने गाडी सुविधा पनि २१ गते नै प्रदेश सभामा बुझाइसकेका थिए । तर चौधरीले प्रदेश सभालाई जानकारी नगराएकाले यो विषय ढिलो मात्र सार्वजनिक भएको हो ।

चौधरीले तिमिल्सिनालाई १३ फागुन २०७९मा प्रमुख सचेतक नियुक्त गरेका थिए । बर्दिया २ (क) बाट निर्वाचित तिमिल्सिना कांग्रेसभित्र संस्थापन पक्षका हुन् । तिमिल्सिना पार्टीको केन्द्रीय संगठन विभाग सदस्य एवं महासमिति सदस्य हुन् ।