२० सदस्यीय जम्बो मन्त्रिपरिषद बनाएकोमा जनमतको असन्तुष्टि, मुख्यमन्त्रीलाई सोधियो स्पष्टीकरण

२५ साउन, काठमाडौं । जनमत पार्टीले मधेश प्रदेशका मुख्यमन्त्री सतिशकुमार सिंहलाई स्पष्टीकरण सोधेको छ । सिंहलाई स्पष्टीकरण सोध्ने निर्णय भएको प्रवक्ता शरदसिंह यादवले जानकारी लिए । मुख्यमन्त्री सिंहमाथि मन्त्रालय बाँडफाँट र राज्यमन्त्रीहरू थप गर्दा पार्टीसँग समन्वय नगरेको आरोप छ । 

सरकारको कामभन्दा अनावश्यक उद्घाटनहरुमा समय खर्चिएको र पार्टीले दिएको निर्देशन बेवास्ता गरेको आरोप समेत मुख्यमन्त्री सिंहमाथि छ । मुख्यमन्त्री सिंहले अहिलेसम्मकै ठूलो २० सदस्यीय मन्त्रिमण्डल गठन गरेका थिए । जनमतका सांसदसमेत रहेका मुख्यमन्त्री सिंहलाई पार्टीसँग समन्वय नगरी महत्वपूर्ण निर्णय लिने गरेकोमा स्पष्टीकरण सोधिएको हो ।

बजेटमा संसदहरूका लागि पाँच करोड रुपैयाँ दिने विवादास्पद निर्णय गरेकोमा पनि पार्टीले मुख्यमन्त्रीसँग स्पष्टीकरण मागेको छ । यस्ता काम कारबाहीले जनमत पार्टीको छविमा बारम्बार आँच पुर्याएको जनमतको दावी छ ।  मुख्यमन्त्री सिंहले गत मंगलबार नेपाली कांग्रेसका दुई, नेकपा एमाले, जनमत र लोसपाबाट एक–एक जना गरी पाँच राज्यमन्त्री थप गरेका थिए ।

१२ मन्त्रालय रहेको मधेसमा यसअघि मुख्यमन्त्रीसहित १२ मन्त्री र तीन राज्यमन्त्री थिए । यहाँ कांग्रेसले चार, एमालेले चार, जनमतले मुख्यमन्त्रीसहित ३, लोसपाले एक मन्त्रालय लिएका थिए । यिनै दलहरूबाट राज्यमन्त्रीहरू पनि नियुक्त गरिएको थियो । मधेसमा सिके राउत नेतृत्वको जनमत पार्टी नेतृत्वमा सरकार छ ।