पूर्वराजाका ज्वाई सिंहसँग आफ्नो सम्पत्तिबाट सुमेरुको रकम फिर्ताबारे समितिले गर्यो छलफल

२८ साउन, काठमाडौं । सहकारी ठगी सम्बन्धमा छनबिन गर्न बनेको संसदीय विशेष समितिले सोमबार सुमेरू वचत तथा ऋण सहकारी संस्था लिमिटेड पुल्चोकका शेयर सदस्य राजबहादुर सिंहसँग छलफल गरेको छ । उनी पूर्वराजाका ज्वाई हुन् । उनीसँग समितिले सुमेरुका वचतकर्ताको रकम सिंहको सम्पतीबाट फिर्ता गर्ने विषयमा छलफल भएको हो । 

सहकारी संस्था बचत तथा रकम दुरुपयोग सम्बन्धमा गठित समितिको छानबिन अन्तिम चरणतिर पुगेको जनाएको छ । समितिले बचतकर्ताको रकम दुरुपयोग गर्ने सहकारीका सञ्चालकलगायतसँग सोधपुछ गरिरहेको छ । सोमबार सुमेरू वचत तथा ऋण सहकारी संस्था लिमिटेड पुल्चोकका शेयर सदस्य राजबहादुर सिंहसँग सोधपुछ गरिएको समितिका सभापति सूर्य थापाले जानकारी गराए ।

सिंहले आफ्नो निजी सम्पत्तिबाट समेत बचतकर्ताको रकम फिर्ताको व्यवस्था थालनी गरी विश्वासको वातावरण सिर्जना गरेर सहकारी संस्थाको पुनः सञ्चालन गर्ने योजनाका साथ नयाँ सञ्चालक समूह आएको जानकारी गराएका थिए । सुमेरु सहकारीले यसअघि सुमेरु समूहको सम्पत्ति बेचेर बचतकर्ताको रकम फिर्ता गर्ने प्रतवद्धता गरेको थियो ।

सुमेरुले प्रदेश रजिष्ट्रारको कार्यालयमा पेश गरेको वित्तीय विवरणअनुसार ८ अर्ब बढी दायित्व र १० अर्ब सम्पत्ति छ । सहकारी छानबिन समितिले केही दिनअघि मात्र बचतकर्ताको रकम दुपयोगमा जेलमा रहेका सञ्चालकहरूलाई बोलाएर सोधपुछ गरिएको थियो ।