जीतपुरसिमरा उपमहानगरमा मेयर र वडाध्यक्षबीच कुटाकुट

२९ साउन, वीरगंज । बाराको जीतपुरसिमरा उपमहानगरपालिकाका मेयर राजन पौडेल र वडा नम्बर २ का वडाध्यक्ष धनबहादुर श्रेष्ठबीच विवाद भएपछि हात हालाहाल भएको छ । शिक्षक सरुवाको विषयलाई लिएर भएको विवाद बढ्दै गएपछि कुटाकुट भएको हो । 

मेयर पौडेलले वडा नम्बर २ स्थित सिमरा नेरा नमूना माध्यमिक विद्यालयमा कार्यरत शिक्षक मेघराज गिरीलाई वडा नम्बर ७ स्थित फकिरा गिरी राजेश्वर गिरी माध्यमिक विद्यालयमा सरुवा गरे । यस्तै, फकिरा गिरी राजेश्वर गिरी माध्यमिक विद्यालयमा कार्यरत महिला शिक्षक सीता अधिकारीको सरुवा गरी वडा २ स्थित सिमरा नेरा नमूना माध्यमिक विद्यालयमा पठाए ।

मेयरले गरेको शिक्षक हेरफेरको निर्णयमा वडाध्यक्ष श्रेष्ठले असहमति जनाएका थिए ।  आफूसँग सल्लाह समेत नगरी मेयरले एकलौटी निर्णयमा शिक्षक सरुवा गरेको भन्दै विरोध गरेका थिए ।  त्यही क्रममा आज सिमरा नेरा नमूना माध्यमिक विद्यालयमा शिक्षक सिता अधिकारी पुगेपछि विवाद बढेको बताइएको छ । वडाध्यक्षले हाजिर हुन नदिने भनेपछि मेयर पौडेल विद्यालय पुगेका थिए ।

मेयर पौडेल जर्वजस्ती हाजिर गराउन खोज्दा वडाध्यक्षसँग हात हालाहाल भएको बताइएको छ । झडपको अवस्था सृजना भएपछि घट्नास्थलमा प्रहरी पुगेको थियो ।