सरकार निरीह भयो, माफियाले विद्यालयदेखि विश्वविद्यालयसम्मको शिक्षा प्रणाली ध्वस्त बनाएः नेपाल

१५ भदौ, काठमाडौं । नेकपा एकीकृत समाजवादीका अध्यक्ष माधवकुमार नेपालले नेपालको शिक्षा प्रणाली सरकारले नभइ माफियाहरुले चलाउने गरेको बताएका छन् । उनले माफियाको सञ्जालले नेपालका विद्यालयदेखि विश्वविद्यालयसम्मको शिक्षा ध्वस्त बनाएको दावी गरेका छ । 

नेपालको शैक्षिक क्षेत्रमा देखापरेका माफियाको चंगुलमा सरकार र सरकारी संयन्त्रहरु फसिसकेको उनको भनाइ छ । शनिवार काठमाडौँमा आयोजित वृहत् शैक्षिक अन्तरक्रिया कार्यक्रममा अध्यक्ष नेपालले सरकार माफियाका अगाडि निरीह रहेको बताए । नेपालको शैक्षिक प्रणाली र शिक्षण संस्थाहरूमा सुधार ल्याउन सबैभन्दा पहिले माफिया तन्त्रको अन्त्य हुनुपर्ने उनले बताए । 

माफियाको हातबाट शिक्षा क्षेत्र फिर्ता नल्याएसम्म अहिलेको शिक्षाबाट रोजगारीको अवसर सृजना गर्ने कुरा सम्भव नहुने उनको भनाइ छ । उनले माफियाका कारण विश्वविद्यालयहरू समय सीमा भित्र बस्न नसकेको र उपयुक्त शैक्षिक कार्यक्रमहरू बनाउन नसकेको बताए । विद्यार्थी संगठनहरूले पनि विश्वविद्यालय तहको शैक्षिक कार्यक्रमलाई विद्यार्थीहरूको हित अनुकूल हुने गरी अघि बढाउने पहल गर्न नसकेको नेपालले बताए । 

उनले भने, ‘यहाँ अनेक माफियाहरूले चलखेल गरिरहेका छन् । नेपालको एजुकेसन सिस्टमलाई खत्तम पार्ने षड्यन्त्र भइराखेको छ । ती सबै षड्यन्त्रहरूप्रति गम्भीर हुनुपर्ने आवश्यकता छ । र कसरी देशमा शिक्षा प्रणालीमा सुधार गर्ने हो ? दक्ष जनशक्ति तयार गर्ने हो ? योग्य जनशक्ति तयार गर्ने हो ? अब कुन कुन विषयमा आउने ५ वर्षमा कति जना व्यक्तिहरूलाई रोजगारी दिन सक्छौ ? त्यो हामी अगाडि सार्दैनौँ । त्यो सबै सन्दर्भमा पनि हामीले गम्भीरताका साथ ध्यान दिनु जरुरीभइसक्यो ।’