प्रस्तावित १७ देशका राजदूतको आजदेखि सुनुवाइ, पहिलो चरणमा चार जना बोलाइयो

१६ भदौ, काठमाडौं । प्रतिनिधिसभा अन्तर्गतको संसदीय सुनुवाइ समितिले आज आइतबारदेखि १७ देशका लागि सिफारिस राजदूतको सुनुवाइ सुरु हुँदै छ । प्रस्तावित १७ राजदूतको सुनुवाइ ८ दिनमा सम्पन्न गर्ने कार्ययोजना समितिले बनाएको छ । 

समितिले प्रस्तावित राजदूतमध्ये आज ४ जनालाई बोलाएको छ । समिति सभापति ईश्वरी न्यौपानेले प्रस्तावित राजदूतविरुद्ध उजुरी दर्ता गराउनेहरूसँग छलफल भइसकेकाले सुनुवाइ प्रक्रिया अघि बढाउन लागेको जानकारी दिइन् । समितिमा ९ उजुरी परेका छन् ।

मलेसियाका लागि प्रस्तावित राजदूत नेत्रप्रसाद तिमिल्सिना, इजरायलका लागि धनप्रसाद पण्डित, भारतका लागि शंकरप्रसाद शर्मा र दक्षिण अफ्रिकाका लागि प्रस्तावित प्राडा कपिलमान श्रेष्ठविरुद्ध उजुरी परेका छन् । अरु १३ जनाविरुद्ध भने उजुरी परेको छैन ।

आज चीनका लागि प्रस्तावित प्राडा कृष्णप्रसाद ओली, भारतका लागि शर्मा, जर्मनीका लागि डा. शैल रूपाखेती र डेनमार्कका लागि प्रस्तावित सुम्निमा तुलाधरलाई बोलाइएको छ । त्यसपछि क्रमशः अरुको सुनुवाइ हुनेछ । राजदूतहरूको कूटनीतिक क्षमता र ज्ञान, योग्यता, अनुभव तथा समानुपातिक र समावेशिताका साथै राजदूत नियुक्तिसम्बन्धी निर्देशिका, २०७५ को पालना नभएका विषयमा पनि समितिमा उजुरी परेका छन् । 
 
सरकारले राजदूत सिफारिस समानुपातिक र समावेशी प्रतिनिधित्व गर्नुपर्ने संवैधानिक व्यवस्था तथा राजदूत नियुक्तिसम्बन्धी निर्देशिका पालना नगरेको भनी प्रश्न उठिरहेका बेला सुनुवाइ सुरु हुन लागेको हो ।