सहकारी छानबिन संसदीय समितिको म्याद थप गर्ने तयारी

१७ भदौ, काठमाडौं । सहकारी संस्थाहरूको बचत रकम दुरुपयोग सम्बन्धमा संसदीय छानबिन विशेष समितिको समय अवधि थप हुने भएको छ। मंगलबार बस्ने प्रतिनिधिसभा बैठकमा समिति सभापति सूर्यबहादुर थापा क्षेत्रीले समितिको कार्यअवधि थप्ने प्रस्ताव पेश गर्ने भएका छन्।

अध्ययन अनुसन्धान र सोधबुझको कार्यक्रम बाँकी रहेकाले समयावदी थप्नु परेको समितिको भनाइ छ। समितिका कार्यअवधि यही २३ गते सकिँदैछ। भोलि प्रतिनिधिसभा बैठकमा समिति सभापतिले कार्यअवधि थप सम्बन्धी प्रस्ताव पेश गर्ने र कति दिन थपिने भन्ने कुरा भोलि नै निर्णय हुने बताइएको छ । 

समितिका एक सदस्यका अनुसार भदौ अन्तिमसम्मको समय अवधि थपिने बताइएको छ। तत्कालीन गृहमन्त्री रवि लामिछानेमाथि विभिन्न सहकारीको रकम अपचलन गरेको आरोप लागेपछि १५ जेठमा एमाले सांसद सूर्यबहादुर थापाको सभापतित्वमा सहकारी संस्था वचत रकम दुरुपयोग सम्बन्धमा संसदीय छानबिन विशेष समिति गठन भएको थियो ।