बीमाको भुक्तानी माग्दै नेपाल बिमक संघले सरकारविरुद्ध सर्वोच्चमा हाल्यो रिट, सोमबार पेशी

२३ भदौ, काठमाडौं । नेपाल बिमक संघले कोरोना बीमाको रकम माग गर्दै सरकारकाविरुद्ध सर्वोच्च अदालतमा रिट हालेको छ । निर्जीवन बिमा कम्पनीहरूको छाता संगठन नेपाल बिमक संघले आइतबार सर्वोच्च अदालतमा रिट दर्ता गरेको हो ।

कोरोना बिमाको मापदण्ड अनुसार सरकारले दिनुपर्ने रकम नदिँदा बीमितको रकम फिर्ता दिन नसकिएको रिटमा उल्लेख छ । सरकार, बिमक संघ र बिमा प्राधिकरण बीचको सहमतिअनुसार सरकारले कोरोना बीमा रकम भुक्तानी नगरेको भन्दै संघले सो रकम भुक्तानी गराइ पाउँ भन्दै अन्तरिम आदेश माग गरेको छ ।

सो रिट निवेदनमाथि सोमबार बिहान १० बजे पेशी तोकिएको छ । सरकारले नै भुक्तानी नदिएपछि एक लाख भन्दा बढी बीमितको करिब ११ अर्ब रुपैयाँ भुक्तानी गर्न बाँकी छ ।