रास्वपाका सभापति रवि लामिछानेलाई पोखरामा कालो झण्डा, सहकारी पीडित निस्किए सडकमा

२५ भदौ, पोखरा । पोखराका सहकारी बचतकर्ताले राष्ट्रिय स्वतन्त्र पार्टी (रास्वपा)का सभापति तथा पूर्वगृहमन्त्री रवि लामिछानेलाई कालो झण्डा देखाएका छन् । रास्वपा गण्डकी प्रदेश विस्तारित बैठकमा सहभागी हुन आएका लामिछानेलाई सहकारी बचतकर्ताले कालो झन्डासहित नाराबाजी गरेका हुन् ।

लामिछाने सहभागी हुने कार्यक्रमस्थल बाहिर सहकारी पीडितले प्रदर्शन र नाराबाजी गरेका छन् । लामिछाने एक कार्यक्रममा सहभागी हुन पोखरा आउने थाहा पाएपछि सहकारी पीडित आन्दोलनमा उत्रिएका हुन् । 

पोखरामा हुने गण्डकी प्रदेश स्तरीय बैठकलाई सम्बोधन गर्न लामिछाने पोखरा आउँदैछन् भन्ने खबर पाएलगत्तै सूर्यदर्शन सहकारी संस्थाका बचतकर्ताहरु प्रदर्शनमा उत्रिएका थिए । उनीहरुले सहकारी ठगी गरेको भन्दै लामिछानेविरुद्ध नाराबाजी गरिरहेका छन् ।

पोखरा महानगरपालिका–१७ बिरौटास्थित ग्यालेक्सी व्याङक्वेट रास्वपाको कार्यक्रम राखिएको छ । सोही ब्याक्वेटबाहिर सूर्यदर्शन सहकारी संस्थाका बचतकर्ताले प्रदर्शन गरेका हुन् । प्रदर्शनका कारण सो क्षेत्रमा बाक्लो संख्यामा प्रहरी परिचालन गरिएको छ ।