अख्तियारको सिफारिसमा सरकारी कर्मचारीलाई कार्यालय समयभित्र शेयर कारोबार गर्न रोक

२५ भदौ, काठमाडौं । सरकारले कार्यालय समयभित्र सरकारी कर्मचारीलाई शेयर कारोबार गर्न रोक लगाएका छ । कार्यालय समयमा कर्मचारी शेयर कारोबारमा व्यस्त हुँदा सेवा प्रभावित भएको भन्दै अख्तियार दुरुपयोग अनुसन्धान आयोगले यसको रोक लगाउन सरकारलाई  सिफारिस गरेको थियो । 

यसका लागि प्रधानमन्त्री तथा मन्त्रिपरिषदको कार्यालयले सबै मन्त्रालय, आयोग, विभागहरू निर्देशन दिइसकेको छ । प्रधानमन्त्री तथा मन्त्रिपरिषद्को कार्यालयले लेखेको पत्रमा सरकारका सबै सरकारी तथा सार्वजनिक निकायहरूमा कार्यालय समयमा टीएमएस नचलाउने व्यवस्था हुन र सो समयमा टीएमएस चलाएको वा नचलाएको सम्बन्धमा सूचना प्रविधिको प्रयोग गरी जाँच गर्न सकिने व्यवस्था मिलाउनु पर्ने उल्लेख छ ।

कार्यालय समयमा कर्मचारी शेयर किनबेच गर्ने अनलाइन प्रणाली (ट्रेड म्यानेजमेन्ट सिस्टम–टीएमएस)मा व्यस्त हुन थालेको उजुरी अख्तियारमा परेको थियो । उजुरीका आधारमा अख्तियारको टोलीले सिंहदरबार परिसरलगागत सरकारी कार्यालयको स्थलगत निरीक्षण गर्दा तथ्य फेला पारेपछि कार्यालय समयमा शेयर कारोबार रोक्न सरकारलाई पत्र लेखेको थियो । सोही पत्रका आधारमा सरकारले कार्यालय समयमा टीएमएस चलाउन नपाउने निर्णय गरी कार्यान्वयन गर्न मातहतका सबै निकायलाई निर्देशन दिएको हो ।