सोमबार बजेट सार्वजनिक गर्ने तयारीमा सुदूरपश्चिमका मुख्यमन्त्री शाह

२९ भदौ, धनगढी । अघिल्लो सरकारले असार १ गते प्रदेश सभामा प्रस्तुत गरेको बजेट पास नभएपछि नवगठित सरकारले फेरी बजेट पुनर्लेखन गरी सार्वजनिक गर्ने तयारी गरेको छ । सुदूरपश्चिम प्रदेशका मुख्यमन्त्री कमलबहादुर शाहले भदौ ३१ गते सोमबार चालु आर्थिक वर्षको बजेट ल्याउने बताएका छन् । 

मुख्यमन्त्री शाहले शनिबार बिहान पत्रकार सम्मेलन गर्दै भदौ ३१ गते बजेट ल्याउने बताए । उनले गत असार १ गते प्रदेश सभामा प्रस्तुत भएको बजेटसम्बन्धी कानुन फिर्ता लिएर नयाँ बजेट ल्याउने तयारी गरेको जानकारी दिए । संवैधानिक र कानुनी प्रक्रियामा रहेर नै बजेट आउने र वर्तमान सरकारले बजेट पुनः लेखन गरेको उनले बताए । 

उनले बजेट निर्माणको लागि निर्धारण गरेको ४ वटा आधारहरूभित्रै रहेर बजेट तयार गरेको बताए । २५ लाख भन्दामाथिका योजना राख्ने, आवश्यकता र आौचित्यको आधारमा २५ लाखभन्दा कम बजेट विनियोजन गर्नुपर्ने भएमा कार्य योजनासहित ससर्त अनुदानको रूपमा स्थानीय तहलाई वित्तीय हस्तान्तरण गर्ने, प्रदेश सरकारबाट व्यक्ति, समूह, संस्था, निजी फर्म, कम्पनी र सहकारीलाई बजेट तोकेर विनियोजन नगर्ने र प्रदेश सरकारबाट कार्यान्वयन हुने कुनै पनि योजना उपभोक्ता समितिमार्फत नगरिने आधार तय गरिएको उनले यसअघि नै सार्वजनिक गरेका थिए ।