सहकारी ठगेर भागेका ढोरपाटनका मेयर देवकुमार नेपाली दिल्लीमा पक्राउ, नेपाल ल्याउने तयारी

११ असोज, काठमाडौं । सहकारीको रकम अपचलन गरी भागेका बागलुङको ढोरपाटन नगरपालिकाका मेयर देवकुमार नेपाली भारतको नयाँ दिल्लीबाट पक्राउ परेका छन् । नेपालीलाई भारतको नयाँ दिल्लीमा भारतीय सुरक्षाकर्मीको सहयोगमा नियन्त्रणमा लिइएको बताइएको छ । 

नेपाल प्रहरीका अनुसार भारतस्थित नेपाली दूतावासबाट समन्वय गरेर उनलाई नेपाल ल्याउने प्रक्रिया थालिएको छ । उनी विरुद्ध इन्टरपोलमा रेड नोटिस जारी भएकाले दिल्लीमा फेला परेपछि पक्राउ गरिएको हो । नेपालीलाई नेपाल ल्याउन आवश्यक कूटनीतिक प्रक्रिया पुरा गर्नुपर्छ । 

बागलुङ र पोखरामा इमेज सहकारी खोलेर बचत अपचलन गरी उनी फरार रहेका थिए । यो सहकारी प्रकरणमा मुछिएका अरू केही सञ्चालक र कर्मचारीविरुद्ध मुद्दा चले पनि उनी कारबाहीको दायराबाहिर थिए । उनी इमेज सहकारीका संस्थापक अध्यक्ष हुन् । 

उनीसहित ११ जनाविरुद्ध २०८० असार २५ गते जिल्ला सरकारी वकिलको कार्यालय बागलुङले जिल्ला अदालतमा मुद्दा दायर गरेको थियो । बचतकर्ताको डेढ अर्ब र विभिन्न बैंकहरुको ३५ करोड गरी करिब २ अर्ब रुपैयाँ हिनामिना गरी उनी बेपत्ता थिए ।