छठसम्म कास्कीमा राखेर लामिछानेलाई सुप्रिम सहकारीको रकम ठगीमा अनुसन्धान गर्न रुपन्देही लगिने

१९ कात्तिक, काठमाडौं ।  सहकारी ठगी प्रकरणमा पक्राउ परेका राष्ट्रिय स्वतन्त्र पार्टीका सभापति एवं पूर्वगृहमन्त्री रवि लामिछाने यतिबेला कास्की प्रहरीको हिरासतमा छन् । मंगलबार उनलाई म्याद थपका लागि अदालत उपस्थित गराइँदैछ । कात्तिक २ गतेदेखि सहकारी ठगी मुद्दाको अनुसन्धानका लागि उनलाई कास्की प्रहरीको हिरासतमा राखिएको छ । 

कास्की प्रहरीका अनुसार मंगलबार रविलाई अदालत लगेर म्याद थप गर्ने र त्यसपछि रुपन्देही पठाइनेछ । बिचमा छठ विदा पनि भएकाले उनलाई छठ सकिएपछि रुपन्देही लगिने भएको छ । सुप्रिम सहकारी ठगी आरोपमा रविविरुद्ध रुपन्देहीबाट पनि पक्राउ पुर्जी जारी भएको छ । तर, प्रहरीले समन्वय गरी उनलाई कास्कीबाट रुपन्देही पठाउने तयारी गरेको छ ।  

अहिले पनि अनुसन्धानकै प्रक्रियामा रहेको र छठ पर्व सकिएपछि रुपन्देही पठाइनेछ, कास्की प्रहरीका एक अधिकारीले भने कास्की अदालतबाट म्याद थप नभएको अवस्थामा पनि रविलाई रूपन्देही लगेर अनुसन्धान गर्न सकिन्छ तर, छठ विदाभर यतै राखिन्छ । प्रहरी हिरासतमा रहेका लामिछानेलाई अदालतले पक्राउ अनुमति दिएपछि रूपन्देही प्रहरीले पनि  कास्की प्रहरीमा पत्राचार गरेको छ । छठपछि बुटवल पठाइन्छ, उनले भने । 

लामिछानेलाई सहकारी ठगी र संगठित अपराध कसुरमा अनुसन्धान गर्न प्रहरीले रुपन्देही पठाउने तयारी गरेको हो । कास्की प्रहरीले अनुसन्धानका लागि अदालतबाट पाएको म्याद १४ गते नै सकिएको थियो । तर, तिहार बिदाका कारण उनी प्रहरी हिरासतमै छन् । मंगलबार म्याद थप नभएको अवस्थामा सोही दिन र म्याद थप भएमा छठ पर्वपछि बुटवल लाने रूपन्देही प्रहरीको तयारी छ ।

बुटवलस्थित सुप्रिम ऋण तथा बचत सहकारी संस्थाको १४ करोड २९ लाख रुपैंयाँ गोर्खा मिडिया नेटवर्क प्रालिमा लगेर खर्च गरेको कसुरमा अनुसन्धान गर्न रूपन्देही जिल्ला अदालतले कात्तिक ८ गते नै लामिछाने, जिबी राईसहित १२ जनालाई पक्राउ अनुमति दिएको थियो । प्रहरीले अदालतको त्यही अनुमतिअनुसार अनुसन्धानका लागि बुटवल ल्याउने तयारी गरेको हो । बुटवलस्थित सुप्रिम सहकारीबाट १ करोड ९६ लाख रवि लामिछानेकै नाममा र १४ करोड २९ लाख रुपैयाँ विभिन्न व्यक्तिमार्फत गोर्खा मिडिया नेटवर्कमा पुगेको संसदीय छानबिन विशेष समिति र प्रहरीको प्रतिवेदनमा उल्लेख छ ।

बुटवलस्थित सुप्रिम बचत तथा ऋण सहकारीबाट लामिछानेको नाममा बुटवल उप महानगरपालिका–९ राजमार्ग चौराहा कार्यलय रहेको सुप्रिम बचत तथा ऋण सहकारी संस्थाबाट २०७७ चैत १८ मा २ करोड ऋण लिएको अनुसन्धानबाट खुलेको छ । २ करोडमध्ये संस्थाले काट्ने सेवा शुल्क कटाएर लामिछानेले १ करोड ९६ लाख ऋण लगेका छन् । ऋण लैजाने क्रममा उनी गोर्खा मिडिया नेटवर्कमा कार्यकारी निर्देशकका रूपमा कार्यरत थिए ।