कांग्रेस र एमालेको हानथापले नेतृत्वविहीन भयो स्वास्थ्य बीमा बोर्ड, अध्यक्षको राजीनामा बल्ल स्वीकृत

२६ कात्तिक, काठमाडौं । सरकारमा रहेका दल नेपाली कांग्रेस र नेकपा एमालेबीच तानातान चल्दा स्वास्थ्य बीमा बोर्ड नेतृत्वविहीन बनेको छ । बोर्डमा कसलाई पठाउने भन्नेबारे दुई दलबीच गलफती छ । स्वास्थ्य बीमा बोर्डका निर्देशक डा. दामोदर बसौलाको चार वर्षे कार्यकाल कात्तिक २५ मा पूरा भएसँगै बीमा बोर्ड नेतृत्वविहीन भएको हो ।

अध्यक्ष रहेका डा. गुणराज लोहनीले दुई महिना अघि (२८ भदौमा) राजीनामा दिएका थिए । तर उनको राजीनामा बल्ल आएर स्वीकृत भएको छ । बोर्डको नेतृत्व रिक्त हुन पूर्व जानकारी भएपनि माथि कुरा नमिल्दा मन्त्रालयले त्यसको वैकल्पिक व्यवस्था गर्न सकेको छैन । बोर्डमा नेतृत्व खाली रहँदा स्वास्थ्य मन्त्रालय अन्तर्गत महाशाखाका कुनै कर्मचारीलाई कार्यकारी निर्देशकको जिम्मेवारी दिँदै आएको छ ।

कर्मचारीका अनुसार अहिले दुवै पदमा पार्टीगत भागबन्डाको आधारमा नियुक्ति गर्ने तयारी चलिरहेको छ । ठूला सत्तारुढ दले भागबन्डाको आधारमा ल्याउने तयारी भएको छ । अध्यक्ष र निर्देशक लागि केही व्यक्तिले चलखेल पनि थालेका छन् । स्वास्थ्य तथा जनसंख्या मन्त्री प्रदीप पौडेलले स्वास्थ्य बीमालाई प्राथमिकतामा राखेर काम गरिरहेको बताएका बेला स्वास्थ्य बीमा बोर्ड भने नेतृत्वविहीन भएको छ । 
 
बल्ल आएर स्वास्थ्य बिमा बोर्डका अध्यक्ष लोहनीले बुझाएको राजीनामा दुई महिनापछि स्वीकृत भएको छ । आइतबार बसेको मन्त्रिपरिषद् बैठकले उनको राजीनामा स्वीकृत गरेको हो । २०८० मंसिर १४ मा बोर्ड अध्यक्ष नियुक्त भएका डा. लोहनीले तीन वर्ष दुई महिना कार्यकाल बाँकी रहँदै गएको भदौ २८ गते राजीनामा पत्र बुझाएका थिए ।
 
स्वास्थ्य मन्त्रीको सचिवालयमा बुझाइएको पत्र स्वास्थ्यमन्त्री प्रदीप पौडेलले असोज पहिलो साता नै मन्त्रिपरिषद् लगे पनि स्वीकृत हुन समय लागेको हो । उनको राजीनामा स्वीकृत गर्न किन समय लगाइयो भन्ने कुरा पनि अन्योलमै छ । बोर्डका कार्यकारी निर्देशक डा. युवनिधि बसौलाको समेत सोमबारबाट नै चार वर्षे कार्यकाल सकिएको छ । उनी केही दिनअघि नै बोर्डबाट बिदा भइसकेका छन् । अध्यक्ष र कार्यकारी निर्देशक दुवै बाहिरिएसँगै बोर्ड तत्काललाई नेतृत्वविहीन बनेको छ ।