मौद्रिक नीति समीक्षा सार्वजनिक गर्ने तयारीमा राष्ट्र बैंक

१२ मंसिर, काठमाडौं । नेपाल राष्ट्र बैंकले मौद्रिक नीतिको पहिलो चौमासिक समीक्षा सार्वजनिक गर्ने तयारी गरेको छ । शेयरबजार र घरजग्गा कारोबारलाई लक्षित गरी मौद्रिक नीतिको समीक्षा भइरहेको राष्ट्र बैंक उच्च कर्मचारी स्रोतले जानकारी दिएको छ । बैंकहरुमा अधिक तरलता रहेको र कर्जा लगानी हुन नसकेको विषयलाई पनि ध्यान दिइएको छ । 

मौद्रिक नीतिलाई अझ खुकुलो बनाउन केही प्रावधानहरु परिवर्तन हुनसक्ने बताइएको छ । अर्थमन्त्री विष्णु पौडेलले मौद्रिक नीतिको समीक्षामार्फत अर्थतन्त्रलाई चलायमान बनाउन केही सुधार आवश्यक भएको राष्ट्र बैँकलाई सुझाव दिएका छन् । बैंकको ब्याज लगातार घटेर आउनु तर, लगानी बढ्न नसकेको कुरामा मौद्रिक नीतिले विशेष चासो दिने बताइएको छ । 

गभर्नर महाप्रसाद अधिकारीले पनि मौद्रिक नीतिको समीक्षामा केही विषय परिवर्तन हुने संकेत दिएका छन् । मौद्रिक नीतिको समीक्षाबाटै घरजग्गा तथा शेयर बजारमा थप प्रभाव पर्ने अनुमान गरिएको छ । अधिक कर्जा प्रवाहलाई नियन्त्रण गर्नका लागि राष्ट्र बैंकले घर जग्गा तथा शेयर बजारमा जाने ऋणको जोखिमभारबारे विचार गर्ने बताइएको छ ।