अनलाइन जुवा खेलाउने एकै व्यक्तिको खातामा ५५ करोड, ७५ वटा बैंक खाता र १ सय २८ इसेवा

१३ मंसिर, काठमाडौं । एकै व्यक्तिको खातामा ५५ करोड रुपैयाँको कारोबारमा ७५ वटा बैंक खाता छन भन्दा कसैले नपत्याउलान । कुनै उद्योगपतिको पनि यति धेरै बैंक खाता र व्यक्तिगत रुपमा यति धेरै कारोबार हुन मुस्किल पर्छ । तर अनलाइन जुवा तथा सट्टेबाजीको कारोबार गरेको देखिएपछि एक युवक यति धेरै बैंक खाताको विवरणसहित पक्राउ परेका छन् ।

पाँचथरको मिक्लाजुङ–७ घर भई ललितपुर बस्ने ३७ वर्षीय सुनील राईको भने सानै उमेरमा यति धेरै बैंक खाता र कारोबार गरेको फेला परेपछि प्रहरीको फन्दामा परेका हुन् । उनलाई काठमाडौं उपत्यका अपराध अनुसन्धान कार्यालयको टोलीले पक्राउ गरेपछि ५५ करोडको कारोबार भएको खुलेको हो । बेटिङ एपमार्फत उनले अनलाइन जुवा खेलाएको आरोप छ । साथै उनले क्रिप्टो करेन्सी ट्रेड गर्ने गरेको पनि प्रहरीले जनाएको छ ।

उनको ७५ वटा बैंक खाता र १२८ वटा इ–सेवा वालेट रहेको प्रहरीले जनाएको छ । विभिन्न व्यक्तिको नाममा बैंक खाता तथा इ–सेवा वालेट खोलेर समेत उनले अवैध कारोबार गर्दै आएका थिए । उनको मोबाइलमा बाइनान्स एपसमेत भेटिएको र त्यसमार्फत समेत ६ करोड २३ लाख बराबरको कारोबार देखिएको अपराध अनुसन्धान कार्यालयले जनाएको छ । राईले २५ वटा भन्दा बढी जिमेल आइडी खोली वान एक्स वेटमा प्रयोग गर्नुका साथै विभिन्न स्थानमा कोठा लिएर हुलिया परिवर्तन गर्दै बेटिङ खेल्ने गरेको प्रहरी अनुसन्धानबाट खुलेको छ ।

प्रहरीका अनुसार राइको साथबाट विभिन्न कम्पनीका २ वटा ल्यापटप, मोबाइल सेट ८, एनसेलको सीम कार्ड ८०, एनटीसी सीम कार्ड ५, वाइफाई राउटर २ थान, विभिन्न व्यक्तिका नागरिकता ११ वटा, राहदानी १५ वटा, विभिन्न व्यक्तिको नाममा रहेका बैंक खाताका चेकबुक २२ थान, ४२ वटा एटीएम कार्ड र एउटा मोटरसाइकल बरामद गरेको छ ।

उनीमाथि प्रहरीले मुलुकी अपराध संहित २०७४ को परिच्छेद ५ को दफा १२५ अनुसार जुवा खेल्न वा सट्टेबाजी गर्न नहुने र दफा २६२ (क) १ को अभौतिक मुद्राको प्रयोग गर्न नहुने कसुरमा अनुसन्धान हुने भएको छ ।