फोरजीमा गुणस्तरहीन सेवा दिएपछि दूरसञ्चार प्राधिकरणले एनसेललाई तिरायो ५० हजार जरिवाना

१३ मंसिर, काठमाडौं । नियामक निकाय नेपाल दूरसञ्चार प्राधिकरणले निजी क्षेत्रको दूरसञ्चार सेवा प्रदायक कम्पनी एनसेललाई उपभोक्तालाई गुणस्तरहीन सेवा दिएको भन्दै थप कारवाहीको चेतावनीसहित ५० हजार नगद जरिवाना तिराएको छ । एनसेलले प्राधिकरणसँग गरिएको सर्तविपरित गएर उपभोक्तालाई गुणस्तरहीन सेवा दिएको आरोपमा नगद जरिवाना गरिएको हो ।    

एनसेललाई फोरजी सेवामा गुणस्तर सुनिश्चित नगरेको भन्दै ५० हजार रुपैयाँ जरिवाना प्राधिकरणले तिराएको हो । कम्पनीले जरिवाना दाखिल गरे पनि भविष्यमा गुणस्तर सुनिश्चित गर्न प्राधिकरणले निर्देशन दिएको जनाएको छ । त्यसो नगरे थप कारवाही हुने प्राधिकरणले जनाएको छ । एनसेललाई फ्रिक्वेन्सी उपलब्ध गराउँदा फोरजी सेवाको गुणस्तर र क्वालिटी अफ सर्भिस (क्यूओएस) का विभिन्न सर्त तोकिएको थियो । एनसेलले तोकिएको मापदण्डअनुसार सेवा नदिएपछि ५० हजार जरिवाना तिराइएको हो । 

प्राधिकरण कर्मचारीका अनुसार एनसेललाई यसै साता उक्त जरिवाना तिराइएको हो । एनसेलको फोरजी सेवा सम्बन्धमा गुणस्तर परीक्षण (ड्राइभ टेष्ट) गर्दा कमजोरी देखिएको हो । एनसेलले सर्तबमोजिम गुणस्तरीय सेवाको सुनिश्चितता नगरेकाले प्राधिकरणले दूरसञ्चार ऐन २०५३ को दफा ४७ को व्यवस्थाअनुसार कारबाही गरेको हो । फोरजी सेवाको गुणस्तर परीक्षणका लागि गरिएको ड्राइभ टेस्ट र अन्य प्रमाणहरूको विश्लेषणपछि एनसेलले अपेक्षित गुणस्तरीय सेवा दिन नसकेको प्राधिकरणको ठहर छ । 

एनसेललाई भविष्यमा सेवा सुधारका लागि थप स्रोतसाधन परिचालन गरी गुणस्तर सुनिश्चित गर्न पनि प्राधिकरणले निर्देशन दिइएको छ । दूरसञ्चार ऐनको दफा ४७ (१) मा प्राधिकरणले दिएको आदेश वा निर्देशनको पालना नगरेमा प्राधिकरणले त्यस्तो व्यक्तिलाई ५० हजार रूपैयाँसम्म जरिवाना गर्ने सक्ने उल्लेख छ । थप गल्ती गरे एनसेलले त्यसको हानी नोक्सानीको बिगो वा सोबापत क्षतिपूर्ति भर्नुपर्ने प्राधिकरणले जनाएको छ ।