स्टिकर छपाइ प्रकरणमा विकल र सफललाई ३ करोड ४२ लाख विगो र त्यति नै जरिवाना, ८ वर्ष कैद

१३ मंसिर, काठमाडौं । अन्तःशुल्क स्टिकर छपाइ प्रकरणमा भएको भ्रष्टाचारको विशेष अदालतले बिहीबार सजाय निर्धारण गरेको छ । विशेषले अन्तःशुल्क छपाइ प्रकरणमा मुख्य दोषी ठहरिएका सुरक्षण मुद्रण केन्द्रका तत्कालीन कार्यकारी निर्देशक विकल पौडेल र निर्देशक सफल श्रेष्ठको सजाय निर्धारण गरेको हो । उनीहरू दुबैलाई लाई ८–८ वर्ष कैद सजाय तोकिएको छ । 

उनीहरुलाई जनही ३ करोड ४२ लाख २२ हजार ८ सय रूपैयाँ बिगो र त्यति नै जरिवाना पनि अदालतले तोकेको छ । विशेष अदालतका अध्यक्ष टेकनारायण कुँवर तथा सदस्यद्वय खुसीप्रसाद थारु र रितेन्द्र थापाको इजलासले गत कात्तिक १४ गते गरेको फैसलाको आज सजाय निर्धारण गरेको हो । यस प्रकरणमा जोडिएका पूर्वमुख्यसचिव वैकुण्ठ अर्याललगायतले भने सफाइ पाइसकेका छन् । 

गत असार ९ गते अख्तियार दुरूपयोग अनुसन्धान आयोगले सुरक्षण मुद्रण केन्द्रबाट अन्तःशुल्क स्टिकर छपाइका क्रममा अनियमितता गरेको आरोपमा तत्कालीन मुख्यसचिव अर्यालसहित ११ जनाविरुद्ध भ्रष्टाचार मुद्दा दायर गरेको थियो । यस प्रकरणमा ३८ करोड रूपैयाँ भ्रष्टाचार भएको दावीसहित अख्तियारको मुद्दा हालेको थियो ।