काठमाडौं सिडिओ कार्यालयमा धमिरा कर्मचारीको विगविगी ! नागरिकता लिन पुगेका सेवाग्राहीलाई सास्ती

१३ मंसिर, काठमाडौं । जिल्ला प्रशासन कार्यालय, त्यो जिल्लाको सरकारी कार्यालयको हेड । जिल्लाभरीका सरकारी, अर्ध सरकारी तथा निजी क्षेत्रबाट समेत भए गरेका ढिलासुस्ती, अनियमितता एवं गैरकानुनी क्रियाकलाप बारे चेकजाँच गरी आवश्यक कारवाही गर्ने अख्तियारी पनि जिल्ला प्रशासन कार्यालय अर्थात् सिडिओ अफिसलाई छ । तर, त्यही कार्यालयबाट सेवाग्राहीले हैरानी बेहोर्नु पर्यो भने नि ? त्यसमा पनि राजधानीकै सिडिओ कार्यालयबाट ?

प्रसंग हो, काठमाडौं सिडिओ कार्यालयमा नागरिकता बनाउन पुगेका सेवाग्राहीले भोग्नु परेको तितो यथार्थ । काठमाडौं सिडिओ कार्यालयको अन्य शाखामा सेवाग्राहीमाथि त्यति हैरानी भए–नभएको अनुसन्धानकै क्रममा छ, तर नयाँ नागरिकता शाखामा भने सेवाग्राहीलाई सास्ती दिन धमिरा कर्मचारीको गिरोह नै सक्रिय छ । नागरिकता फाँट अन्तर्गतको झ्याल नम्बर १०२, १०३, १०४ र १०५ मा कार्यरत कुनै पनि कर्मचारी सेवाको भावनाबाट अलिकति पनि ओतप्रोत भएका देखिन्नन् ।

उनीहरुको बोली र व्यवहार सेवाग्राहीलाई सियोले घोचेजस्तो लाग्छ । यसरी, त्यसरी, जसरी पनि दुखै दिने उनीहरुको नियत बुझि नसक्नु छ । त्यसमा पनि १०५ नम्बर झ्यालको कमाण्ड गरेका प्रशासकीय अधिकृत उपेन्द्र साहको त बोली सुकुम्बासी टोलमा बस्नेको भन्दा कम छैन । उनको हेपाहा प्रवृत्तिले सेवाग्राही निराश बन्न पुग्छन् । प्रशासकीय अधिकृतकै छुद्र शैलीको बोलीले सेवा लिन जाने जो कोही अमिलो मन गरेर फर्कनु पर्ने हुन्छ ।

प्रशासकीय अधिकृत साह मात्रै होइनन्, झ्याल नम्बर १०२, १०३ र १०४ का कर्मचारीको पनि शैली उस्तै हो । १०४ की कम्प्युटर अपरेटर नासु अर्चना सुवेदी, १०२ का नासु कैलाश पोखरेल लगायतले यसरी, त्यसरी, जसरी सेवाग्राहीमाथि खोट मात्रै देखाउने । दलालसँग सेटिङमा आएका काम बाहेक अरु सामान्य ढंगबाट आएका काममा उनीहरूबाट दोष र खोट मात्रै लगाउने गरिन्छ । कुनै विषयमा सेवाग्राहीले आफूलाई परेको मर्कामाथि बहस गर्न थाल्यो भने १०१ देखि १०४ सम्मका कर्मचारी एकगठ्ठा हुने र एक स्वरमा सेवाग्राहीलाई निरुत्साहित पार्ने गर्छन् ।

हिजो सोमबार उनीहरुले फाइल नै लुकाएर हिँडेपछि सो घटना सहायक प्रमुख जिल्ला अधिकारीहरू अनिल पौडेल र मुक्तिराम रिजाल पनि अचम्मित भएका थिए । स्वतः हुने र मिलाउँदा मिलाउने काम समेत तिललाई पहाड बनाएर पन्छाउने काम नागरिकता फाँटका धमिरा कर्मचारीबाट हुने गरेको पाइन्छ । झण्डै एक हप्ता लामो सूक्ष्म निगरानीका क्रममा थुप्रै धमिरा कर्मचारीबाट भएका गलत क्रियाकलाप एवं सेवा लिन आएका सेवाग्राहीको गुनासो हाम्रा सम्वाददाताले फेला पारेका छन् । त्यसको अनुसन्धान पनि हुँदैछ ।