शिक्षकको लापरबाहीले विद्यालयको गेट ढल्दा दुई बालक घाइते, एकको अवस्था गम्भीर

♦ मुकेश कुमार यादव

१४ मंसिर, सिरहा । सिरहाको नरहामा शिक्षकहरूको लापरबाहीले विद्यालयको गेट ढल्दा दुईजना बालक घाइते भएको छन् ।

घाइते मध्ये एकको अवस्था गम्भीर रहेको छ। नरहा गाउँ पालिका १ गौरहा स्थित श्री आधारभुत विद्यालयको फलामे गेट ढलेर चोट लाग्दा कक्षा ४ मा अध्ययनरत कासिन्द सदायका छोरा १० वर्षीय राजेश सदाय र फुल कुमार यादवको छोरा ११ वर्षिय प्रिन्स यादव घाइते भएका हुन्। 

घाइते मध्ये राजेशको अवस्था गम्भीर रहेको छ। उनको टाउकोमा गम्भीर चोट लागेकाले थप उपचारको लागि विराटनगर लगिएको विद्यालयका शिक्षक रामजुलुम यादवले बताए। उनले, ‘प्रिन्सको पिठ्युँमा घाउ लागेको र अवस्था चिन्तामुक्त रहेकाले गोलबजारस्थित लाइफ लङ्ग अस्पतालमा उपचार भइरहेको छ।’  फलामे ढोकाले लागेर राजेशको टाउकोमा गम्भीर चोट लागेको शिक्षक यादवले जनाए। 

यता, कार्यालय सहयोगीले विद्यार्थीलाई गेट खोल्न लगाउँदा घटना हुन पुगेको स्थानियहरुको आरोप छ।  ढोका खोल्दा ढोकाबाट साउन्ड आयो र एकैपल्ट ढोका झर्दा बिद्यार्थीहरुको भागाभाग भएको थियो सो क्रममा दुई विद्यार्थी घाइते भएको स्थानियहरुको भनाई छ । 

विद्यालयका कार्यालय सहयोगी मुख्य स्लाईड गेट आधीमात्र खोेलेर कक्षा कोठा र कार्यालय खोल्न गए पछि राजेश गेटमा चढेर प्रिन्सलाई धकेल्न लगाउँदा गेटको चक्का उछिट्टिएर ढल्दा चोट लागेको शिक्षकहरुको भनाई रहेको छ।

विद्यालयका शिक्षकहरू समयमा विद्यालय नआउनाले पनि यो घटना हुन पुगेको अभिभावकहरूको गुनासो रहेको छ।