रामेछाप दुर्घटनामा वडा अध्यक्षसहित ५ जनाको मृत्यु

१४ मंसिर, काडमाडौं । रामेछापमा गाडी दुर्घटना हुँदा ५ जनाको घटनास्थलमै मृत्यु भएको छ । जिल्ला प्रहरी कार्यालय रामेछापका अनुसार गाडीमा सवार ३ जना गम्भीर घाइते भएका छन् । यो दुर्घटनामा जनप्रतिनिधि पनि परेका छन् । दुर्घटनामा रामेछापको गोकुलगंगा गाउँपालिका वडा नम्बर ४ का अध्यक्षको मृत्यु भएको बताइएको छ । 

शुक्रबार दिउँसो सोही गाउँपालिकाको वडा नम्बर ६ स्थित सिमलडाँडा भिरमा फोर्स गाडी दुर्घटना हुँदा वडाध्यक्ष रामचन्द्र बस्नेतको मृत्यु भएको प्रहरीले जनाएको छ ।  उनी गत स्थानीय तह निर्वाचनमा नेपाली कांग्रेसबाट निर्वाचित भएका थिए ।  उक्त दुर्घटनामा अन्य ४ जनाको पनि मृत्यु भएको छ । 

१४ सीट क्षमता भएको उक्त गाडीमा ८ जना सवार थिए । रामेछापका डीएसपी प्रदीप सिंहले ५ जनाको घटनास्थलमै र अन्य तीन जना घाइते भएको जानकारी दिएका छन् । काठमाडौँबाट बेताली जाँदै  गरेको गाडी सडकबाट करिब ३०० मिटर तल खसेको थियो ।