आयुर्वेदको विकास गर्ने कार्ययोजना ल्याउनुस्, तत्काल कार्यान्वयन गर्छु : स्वास्थ्यमन्त्री बस्नेत

२० असार, काठमाडौं ।  स्वास्थ्य तथा जनसंख्या मन्त्री मोहनबहादुर बस्नेतले आयुर्वेदको विकास गर्ने कार्य योजनासम्बन्धी विज्ञले दिने सल्लाह कार्यान्वयन गर्न आफू तयार रहेको बताएका छन् ।

नेपाल आयुर्वेद चिकित्सक संघको २६औं स्थापना दिवसको अवसरमा बुधबार राजधानीमा आयोजना गरेको कार्यक्रममा मन्त्री बस्नेतले आयुर्वेद क्षेत्रका विज्ञहरुले सरकारले केही गरेन भनेर गुनासो मात्र समस्या समाधान नहुने बताए । गुनासाेकाे सट्टा आयुर्वेदको विकासका लागि कस्ले के गर्नु पर्छ भन्ने स्पष्ट दृष्टिकोणसहितको कार्ययोजना लिएर आउन समेत उनले आग्रह गरे । 

उनले ठाेस कार्ययाेजना ल्याए कार्यन्वयन गर्न आफु तयार रहेको बताए । ‘मै मन्त्री भएका बेला कार्ययोजना लिएर आउनुहोस् कार्यन्वयन गराएर छोड्छु’ मन्त्री बस्नेतले भने । 

इच्छाशक्ति, कार्ययोजना र राज्यको सकारात्मक भूमिका भए जुनसुकै काममा पनि सफलता हात पार्न सकिने दावी गर्दै मन्त्री बस्नेतले जागिर खाएर मात्र बस्ने प्रवृतिले नविनतम सोचको विकास हुन नसक्ने बताए । आयुर्वेद क्षेत्र प्रचुर संभावना भएको क्षेत्र भएको बताउदै उनले यस क्षेत्रको मान र शान बढाउन सबै लाग्नु पर्नेमा जोड दिए ।

कार्यक्रममा ओषधि व्यवस्था विभागका महानिर्देशक नारायण ढकालले पछिल्ला वर्षहरुमा पश्चिमा देशहरु समेत आयुर्वेद प्रति आकर्षित भइरहेको बताउँदै यसको विकासका लागि सबैले हातेमालो गर्दै अगाडि बढ्नुपर्ने बताए ।

नेपाल आयुर्वेद चिकित्सक संघका अध्यक्ष डा. श्यामबाबु यादवले स्वस्थ्य समाज निर्माणका लागि आयुर्वेदको विकास हुनु जरुरी रहेकोले सरकारले आयुर्वेदलाई प्राथमिकतामा राखेर नीति बनाउनु पर्नेमा जोड दिए ।