अवैध रुपमा भण्डारण गरिएको ४५ लाखको चिनी बरामद

२२ फागुन, काठमाडौं । सशस्त्र प्रहरीले अवैध रुपमा गोदाम गरिएको ठूलो मात्राका चिनी बरामद गरेको छ । पश्चिम नवलपरासी सुस्ता गाउँपालिका १ बरुवाबाट सोमबार करिब २ हजार बोरा चिनी बरामद गरेको हो ।

भारतबाट अवैध रुपमा ल्याइ गोदाम गरिएको भन्ने विशेष सूचनाका आधारमा सशस्त्र प्रहरी बल नेपाल नम्बर २५ गणले अवैध चिनी, केराउ र प्याज बरामद गरिएको सशस्त्र प्रहरीका सहायक प्रवक्ता नायब उपरीक्षक शैलेन्द्र थापाले जानकारी दिए ।

स्थानीय श्याम भनिने ज्ञानु अर्यालको गोदाममा लुकाइराखेको ५० र ३० किलाको बोरामा रहेको २ सय बोरा भन्दा चिनी र १ हजार ७ सय बोरा भन्दा बढी केराउ बरामद गरिएको उनले बताए ।

बरामद गरिएको चिनी र केराउको मूल्य करिब ४५ लाख बराबर रहेको प्रारम्भिक अनुसन्धानबाट खुलेको सशस्त्र प्रहरीले जनाएको छ । अवैध रुपमा भण्डारण गरी नक्कली कागजपत्र बनाएर देशका विभिन्न ठाउँमा विक्री गर्ने पाइएको प्रहरीको भनाइ छ । 

यसैगरी पश्चिम नवलपरासी सुस्ता गाउँपालिका ५ वनकट्टीबाट मंगलबार बिहान ६७ बोरा प्याज बरामद गरिएको छ । बरामद चिनी, केराउ र प्याजलाई थप कारवाहीका लागि महेशपुर भन्सार कार्यालय पश्चिम नवलपरासी बुझाउने प्रक्रियामा रहेको सशस्त्र प्रहरीले जनाएको छ ।