जापान पठाइदिने भन्दै २१९ जनाबाट २ करोड ६८ लाख ठगी गर्ने दुई जना पक्राउ

२१ वैशाख, काठमाडौं । जापान पठाउने भन्दै २१९ जनाबाट २ करोड ६८ लाख ठगीको आरोपमा प्रहरीले दुई जनालाई पक्राउ गरेको छ । काठमाडौं उपत्यका अपराध अनुसन्धान कार्यालयले शुक्रबार ठगीको आरोपमा पक्राउ परेका नारायणबहादुर राई भन्ने राजन श्रेष्ठ र पर्वराज पाण्डे भन्ने ईश्वरी पाण्डेलाई सार्वजनिक गरेको हो ।

अर्काको नागरिकताबाट बैंकमा खाता खेलेका उनीहरुले जापान पठाइदिने भन्दै दुई करोड ६८ लाख रुपैयाँ ठगी गर्ने कन्सल्टेन्सी सञ्चालक भएको बताइएको छ । राजनले सञ्चालन गरेको नियोनी एजुकेसन कन्सल्टेन्सीमार्फत् विद्यार्थी तथा वर्किन भिसामा जापान पठाउने भन्दै प्रतिव्यक्ति चार लाखदेखि सात लाख रूपैयाँसम्म उठाएको प्रहरीले जनाएको छ । 

उनीहरूलाई उपत्यका अपराध अनुसन्धान कार्यालयको टोलीले पक्राउ गरेको हो । पक्राउ परेका ईश्वरीले पर्वराजको नागरिकता दुरुपयोग गरेर बैंक खाता खोलेको खुलेको छ । नारायणको नागरिकता समेत राजनले दुरुपयोग गरेर खाता खोलेको प्रहरीको भनाइ छ । पीडितलाई सोही बैंक खातामा रकम जम्मा गर्न लगाएर ठगी गरेको प्रहरी अनुसन्धानबाट खुलेको हो । 

उनीहरूलाई कार्यालयका डीएसपी गोविन्द पन्थी नेतृत्वको टोलीले विशेष अनुसन्धानपछि पक्राउ गरेको हो । नारायणको हराएको नागरिकता फेला पारेर राजनले बैंक खाता खोलेका थिए । उनीहरूले लामो समयदेखि ठगी गर्ने उद्देश्यले नै अर्काको नागरिकता दुरुपयोग गरेर खाता खोलेको देखिएको छ । पक्राउ परेकामाथि थप अनुसन्धान हुने प्रहरीले जनाएको छ ।