सीजी फुड्स पार्कमा आक्रमण गरेको आरोपमा २४ जना पक्राउ

२१ वैशाख, काठमाडौं । चौधरी ग्रुप (सीजी) द्वारा ललितपुर भैंसेपाटीमा सञ्चालित सीजी फुड पार्कमा आक्रमण गरेको आरोपमा २२ जना पक्राउ परेका छन् । पक्राउ पर्नेमा १७ महिला र ५ जना पुरुष रहेको ललितपुर प्रहरी प्रवक्ता नरेशराज सुवेदीले जानकारी दिए ।

प्रहरीले बसका चालक र सहचालकलाई पनि नियन्त्रणमा लिएको छ । शुक्रबार अपरान्ह ३ बजे बा ४ ख १०८५ नम्बरको बसमा आएको समूहले पार्कमा कार्यरत कर्मचारीमाथि हातपात तथा भौतिक सम्पत्ति तोडफोड गरेको सीजीले जनाएको छ । 

उनीहरुलाई जावलाखेलस्थित जिल्ला प्रहरी कार्यालयमा ल्याइएको छ । सीजीले घटनामा संलग्नमाथि कानुनी कारबाही गर्न सरकारसमक्ष अनुरोध गरेको छ ।