गुरुङको अन्त्येष्टि परेकाले कांग्रेस संसदीय दलको बैठक सारियो

२७ वैशाख, काठमाडौं । नेपाली कांग्रेसले पार्टीका पूर्वकेन्द्रीय सदस्य तथा संविधान सभा सदस्य सूर्यमान गुरुङको अन्त्येष्टि आज हुने भएपछि संसदीय दलको बैठक भोलि बिहान सारेको छ । मंगलबार गुरुङको  निधन भएको थियो । यसकारण कांग्रेसले संसदीय दल कार्यसमिति र संसदीय दलको बैठक एक दिनलाई सारेको हो । 

कांग्रेसले संसदीय दल कार्यसमितिको बैठक आज दिउँसो १ बजे र दलको बैठक २ बजे नयाँबानेश्वरस्थित संसद भवनको ल्होत्से हलमा बस्ने तय गरेको थियो । संसदीय दल कार्यसमितिको बैठक अब शुक्रबार ८ बजे र दलको बैठक साढे ८ बजे ल्होत्से हलमै बस्ने कांग्रेसले जनाएको छ ।