त्रिभुवन विमानस्थलबाट भन्सार चेक भैसकेपछि समातियो ५ केजी सुन

३१ वैशाख, काठमाडौं । त्रिभुवन अन्तर्राष्ट्रिय विमानस्थलमा भन्सार चेकजाँच भई निस्कन लागेको अवस्थामा ५ केजी सुनसहित दुई भारतीय नागरिक पक्राउ परेका छन् । उनीहरुलाई भन्सारले छोडिसकेको अवस्थामा प्रहरीले समातेको हो । 

काठमाडौं उपत्यका प्रहरी कार्यालयका अनुसार पक्राउ पर्नेमा ३३ वर्षका सुरेश कुमार र ३४ वर्षका मोहन कुमार गणेशन छन् । उनीहरुलाई स्वागत गेट पुगेपछि विमानस्थल प्रहरीले समातेको हो ।

पक्राउ परेका उनीहरुले लगाएको टी–सर्ट, पेन्टी र जिन्स पाइन्टमा लेपन गरिएको अवस्थामा सुन बरामद भएको हो । सुरेश कुमारबाट २ किलो ६०० ग्राम र मोहन कुमारबाट २ किलो ५०० ग्राम सुन बरामद भएको छ । यो कपडासहित जोखिएको तौल हो ।  

फ्लाई दुबईको उडान नम्बर एफजेड ५७५ को विमानबाट उनीहरू आइतबार बेलुका पौने ७ बजे काठमाडौंमा ओर्लिएका थिए । उनीहरुलाई गौशाला प्रहरी कार्यालयबाट विमानस्थल भन्सार कार्यालयको जिम्मा लगाइएको छ ।