विश्वासको मत लिने तयारी मुख्यमन्त्री सोडारी

३० वैशाख, कैलाली । सुदूरपश्चिम प्रदेशका मुख्यमन्त्री दीर्घ बहादुर सोडारीले तेस्रो पटक विश्वासको मत लिने तयारी थालेका छन् । वैशाख ६ गते मुख्यमन्त्री नियुक्त भएपछि उनले वैशाख २१ गते विश्वासको मत लिने तयारी गरेका थिए । 

एमालेले तत्काल केन्द्रमा छलफल नभएको र केन्द्रीय नेतृत्वसँग छलफल र परामर्श नगरी विश्वासको मत नदिने बताएपछि पहिलो दिन अन्तिम समयमा विश्वासको मत लिने प्रक्रिया रोकिएको थियो । 

मुख्यमन्त्री सोडारीले २१ गते विश्वासको मत नपाउने देखेपछि २२ गते साँझ ५ः३० बजे प्रदेश सभा बैठक आह्वान गर्न लगाएका थिए । त्यो दिन पनि एमालेले आफ्नो पुरानै अडान दोहोराएको थियो । २२ गते पनि विश्वासको मत पाउने सम्भावना नरहेपछि अर्काे सूचना जारी नहुँदा सम्मको लागि प्रदेश सभा बैठक स्थगित गरिएको थियो ।

अहिले सम्म प्रदेश सभा बैठक कहिले बस्ने भन्ने निश्चित छैन। तर, मुख्यमन्त्री सोडारी भने पहिलो र दोस्रो प्रयासमा विश्वासको मत नपाउने देखेपछि जेठ ३ गते विश्वासको मत लिने तयारी गरेका छन् । मुख्यमन्त्री सोडारीले जेठ ४ गतेभित्र विश्वासको मत लिइसक्नु पर्ने संवैधानिक व्यवस्था रहेको छ ।