सुदूरपश्चिमका मुख्यमन्त्री सोडारीले भोलि विश्वासको मत लिने

२ जेठ, कैलाली । सुदूरपश्चिम प्रदेशका मुख्यमन्त्री दीर्घ सोडारीले भोलि विश्वासको मत लिने भएका छन् । मुख्यमन्त्री सोडारीले विश्वासको मत लिने प्रयोजनका लागि भोलि बिहान सवा १० बजे सुदूरपश्चिम प्रदेशसभा बैठक बोलाइएको छ ।

यसअघि दुई पटक विश्वासको मत लिने प्रयास गरे पनि एमालेले तत्काल नदिने भनेपछि प्रदेश सभा बैठक स्थगित हुँदै आएको थियो ।  

अहिले विश्वासको मत दिन एमाले तयार भएपछि मुख्यमन्त्री सोडारीले विश्वासको मत लिने तयारी गरेको हो ।  सुदूरपश्चिम एमाले संसदीय दलका नेता राजेन्द्र सिंह रावलले भोलि मुख्यमन्त्रीलाई विश्वासको मत दिने जानकारी दिए ।

पार्टीको केन्द्रीय निर्देशनअनुसार मुख्यमन्त्री सोडारीलाई विश्वासको मत दिने उनले बताए ।  यद्यपि यो बारेमा औपचारिक निर्णय गर्न बाँकी छ । ‘हामी मुख्यमन्त्रीलाई विश्वासको मत दिन्छौं । पार्टी नेतृत्वको निर्देशन पनि प्राप्त भएको छ’, रावलले भने ।

वैशाख ६ गते एमाले, माओवादी, नेकपा एकीकृत समाजवादी, रन्जिता पक्षको नागरिक उन्मुक्ति पार्टी र स्वतन्त्र एक सांसदको समर्थनमा नेकपा एकीकृत समाजवादी संसदीय दलका नेता सोडारी मुख्यमन्त्रीमा नियुक्त भएका थिए ।

जेठ ४ गतेसम्म उनले विश्वासको मत लिनुपर्ने संवैधानिक व्यवस्था रहेको छ । सोडारीले एक दिन अघि नै विश्वासको मत पाउने करिब पक्का जस्तै भएको छ ।