कान्तिपुर पब्लिकेसनका अध्यक्ष कैलाश सिरोहियाविरुद्ध पक्राउ पुर्जी जारी

८ जेठ, काठमाडौं । कान्तिपुर पब्लिकेसन्सका अध्यक्ष कैलाश सिरोहियाविरुद्ध पक्राउ पुर्जी जारी भएको छ । जिल्ला अदालत धनुषाले उनको नाममा पक्राउ पुर्जी जारी गरेको प्रहरी प्रधान कार्यालयले जानकारी दिएको छ ।

यसअघि सर्वोच्च अदालतले कान्तिपुर मिडिया समूहका अध्यक्ष कैलाश सिरोहियाकाे नागरिकता छानबिन गर्नुको कारण पेश गर्न आदेश दिएको थियो ।

धनुषा प्रहरीमा सिरोहियाको नागरिकता छानबिनको माग गर्दै उजुरी परेपछि उनले आफ्नो नागरिकताको छानबिन रोक्न माग गर्दै सर्वोच्च अदालतमा रिट दायर गरेका थिए ।

 जिल्ला प्रहरी कार्यालय धनुषाले सिरोहियालाई पक्राउ गर्न अदालतबाट अनुमति लिएको हो । धनुषा जिल्ला अदालतले नागरिकतासम्बन्धी मुद्दामा उनलाई पक्राउ गर्न चित्रबहादुर गुरुङको २ नम्बर इजलासले आज अनुमति दिएको हो ।

उनको दुईवटा नागरिकता विभिन्न संस्थामा पेश भएको र नागरिकता नम्बर पनि नक्कली रहेको तथा अर्कोसँग मिलेको आरोप छ । सिरोहियाविरुद्ध धनुषा जिल्ला प्रहरी कार्यालयमा नागरिकता कीर्ते रहेको भन्दै उजुरी दर्ता भएको थियो ।