समानुपातिक उम्मेदवारको नामावली टुंग्याउन बालुवाटारमा कांग्रेसको बैठक

१५ असार, काठमाडौं । असोज १६ गते आइतबार समानुपातिकतर्फको उम्मेदवारको बन्दसूचीलाई अन्तिम रुप दिनुपर्ने भएकाले यसै विषयमा छलफल गर्न नेपाली कांग्रेस संसदीय बोर्डको बैठक सुरु भएको छ । बैठकमा अन्य शीर्ष नेताहरु पनि उपस्थित रहेको बताइएको छ । बैठकमा कांग्रेसको असन्तुष्ट पक्ष भनिएको कोाइराला समूहले उठाएका माग सम्बोधन मूख्या एजेण्डा रहेको छ ।

कांग्रेसको समानुपातिकतर्फका उम्मेदवारको बन्द सूचीमा पेस भएका नाम सच्याउनु अघि कोइराला समूहका मागलाई कसरी सम्बोधन गर्ने भन्ने विषयमा संसदीय बोर्ड केन्द्रीत भएको छ । बन्दसूची सच्याएर आफ्नो पक्षका नेताहरुको नाम समावेश गर्न कोइराला समूहले सभापति शेरबहादुर देउवालाई नयाँ लिष्ट बुझाएको छ ।

यसबारे शुक्रबारको बैठकमा पनि छलफल भएको थियो । तर, सभापति देउवा पक्षका केही नेताहरुले कोइराला समूहले मागजति सीट दिन नसकिने भन्दै बैठकमा दवाव दिएका थिए । उनीहरुको दवावका कारण पनि देउवालाई निर्णयमा पुग्न कठिन भइरहेको बताइएको छ । असन्तुष्ट समूले आज साँझसम्म निर्णय कुर्ने जनाएको छ ।

बोर्ड बैठक सुरु भएपनि शीर्ष नेताहरू अहिले बैठकमा पुग्ने क्रम जारी नै रहेको बताइएको छ । कांग्रेसको बैठक सकिएपछि गठबन्धनका शीर्ष नेताको बैठक पनि बस्ने भनिएको छ । शुक्रबार बसेको बोर्ड बैठकले उम्मेदवारहरूको नामावली फाइनल गर्न सकेको थिएन । गठबन्धनमा सहमति नजुटेपछि दलहरू आफ्नो तयारीमा लागेका छन् । गठबन्धनको दल जसपाको कार्यकारिणी बैठक पनि बसिरहेको छ ।

यता, कोइराला समूहका नेताहरु पनि छलफलमा जुटिरहेका छन् । आज साँझसम्ममा कस्तो निर्णय आउने, सभापति देउवाले भनेअनुसार नगरे कसरी अगाडी जाने भन्ने विषयमा कोइराला समूहमा छलफल चलिरहेको छ । यो समूहले समानुपातिकमा ३८ सीट संख्या मागेको छ । जसलाई संस्थापन पक्षले स्वीकार गरेको छैन् ।