कालिका कन्ट्रक्सनकाे ग्रेडरकाे ठक्करबाट छात्राको मृत्यु

१५ मंसिर, धनगढी । ग्रेडरले साइकललाई ठक्कर दिँदा स्कुल जाँदै गरेकी बालिका चेतना साउदको मृत्यु भएको छ ।

धनगढी उपमहानगरपालिका–५ स्थित हसनपुर–पिपल चौतारा सडकखण्डमा बिहीबार बिहान कालिका कन्ट्रक्सनको ना १ क ९७५ नम्बरको ग्रेडरले ठक्कर दिँदा १५ वर्षीया साउदको मृत्यु भएको प्रहरीले जनाएको छ ।

ठक्करबाट पञ्चोदय माध्यमिक विद्यालय हसनपुरमा ८ कक्षामा अध्ययनरत बालिका साउदको घटनास्थलमै मृत्यु भएको जिल्ला प्रहरी कार्यालय कैलालीका प्रवक्ता प्रहरी नायब उपरीक्षक वेदप्रकाश जोशीले जानकारी दिए ।

बालिका साइकलमा स्कुलतर्फ जाँदै गर्दा सडकको लेवल मिलाउँदै गरेको अवस्थामा ब्याक गर्ने क्रममा ठक्कर दिएको थियो ।

ग्रेडर चालक चितवनको भरतपुर महानगरपालिका–२८ का २७ वर्षीय बिमल कुमाल र ग्रेडरलाई प्रहरीले पक्राउ गरी अनुसन्धान जारी राखेको जनाइएको छ ।